រឿងហេតុដែលបង្កឱ្យមានការជជែកវែកញែកគ្នាយ៉ាងក្ដៅគគុកលើបណ្ដាញសង្គមនេះបានកើតឡើងកាលពីថ្ងៃទី ២៤ ខែមិថុនា ឆ្នាំ២០២១ តារាសម្ដែង-តារាចម្រៀង Liu Yuning ដែលកំពុងស្ថិតក្នុងការថតភាពយន្តថ្មីរបស់លោក បានទាក់ទាញការចាប់អារម្មណ៍អ្នកដែលបានឃើញ គឺលោកស្ថិតក្នុងសំលៀកបំពាក់ប្រពៃណីបុរាណចិន រៀបចំតុបតែងខ្លួនបានយ៉ាងស្អាតសង្ហា ប៉ុន្តែពេលសំរាក តួអង្គម Hao Du ក្នុងរឿងព្រះនាង ឆាងកឺ រូបនេះ បានអង្គុយលើកៅអីតូចមួយហើយជក់បារី បឺតស្រូបយកផ្សែងចូលពេញក្នុងពោះ។
សកម្មភាពជក់បារីបណ្ដើរ អង្រួនជើងបណ្ដើរ ផ្លុំផ្សែងចេញជារូបចិញ្ចៀន ព្រមទាំងមុខសប្បាយរីករាយរបស់លោក បានធ្វើឱ្យកើតជាការតវ៉ា ពិសេសនារីដែលធ្វើការងារជាអ្នក Make Up នឹងមានអារម្មណ៍បែបណាដែលត្រូវរៀបចំខ្លួនឱ្យលោកដែលកំពុងជក់បារីបែបសប្បាយអារម្មណ៍ដោយមិនគិតពីចិត្តអ្នកដទៃ។
បារីគឺជាគ្រឿងផ្ដល់គ្រោះថ្នាក់ដល់សុខភាព ការដែលតារាជក់បារីនៅទីសាធារណៈ ឬសកម្មភាពរបស់តារាជក់បារីត្រូវបានយកទៅបង្ហោះគឺជាកំហុសឆ្គងមួយដ៏ធ្ងន់ធ្ងរ ពិសេសនៅក្នុងទីតាំងថតភាពយន្តទៀត។
នៅឆ្នាំ ២០១៨ នៅពេលមានអ្នកលើកឡើងថាលោកធាត់ Liu Yuning បានឆ្លើយតបថាលោកផ្ដាច់បារីធ្វើឱ្យលោកឃ្លានជាពិសេសលោកច្រើនឃ្លាននៅពេលយប់។ ចូលឆ្នាំ ២០១៩ Liu Yuning បានចូលរួមក្នុងកម្មវិធីទូរទស្សន៍មួយហើយបានប្រកាសថាលោកបានផ្ដាច់បារីបានជោគជ័យ ដើម្បីការពារបំពង់ករបស់លោក។
រូបភាពជក់បារីរបស់លោកបានធ្វើឱ្យមហាជនមានខឹង និងស្ដីបន្ទោសតារារូបនេះយ៉ាងខ្លាំងព្រោះកន្លងមក លោកត្រូវបានគេចាត់ទុកថាជាតារាមួយរូបដែល ជាគំរូល្អប៉ុន្តែលោកបែរជាបង្ហាញនូវទង្វើបែបនេះនៅទីសាធារណៈ។ មហាជនខ្លះបានលើកឡើងថា ដោយសារបច្ចុប្បន្ន Liu Yuning ចាប់ផ្ដើមចាប់យកអាជីពជាតារាសម្ដែងពេញទី ដូច្នេះគេលែងសូវខ្វល់ពីការថែរក្សាសំឡេងទៀតក៏បាន។
ក្នុងនោះក៏មានមជ្ឈដ្ឋានមួយចំនួនបានធ្វើការស្ដីបន្ទោសលោកទៀតថា លោកឈប់និយាយសម្ដីផ្ដេសផ្ដាសអត់បានការប្រសិនបើលោកមិនអាចរក្សាពាក្យសម្ដីរបស់លោក ខណៈអ្នកខ្លះទៀតលើកឡើងមនុស្សកុហក សាងរូបភាពបំភ័ន្តភ្នែកគង់តែបែកធ្លាយ ចំណែកអ្នកខ្លះទៀតក៏បានលើកឡើងដែរថា លោកជាតារាមិនមែនបានសេចក្ដីថាលោកអាចជក់បារីនៅទីសាធារណៈ ឬចង់ធ្វើអ្វីបានតាមចិត្តនោះទេ។
បញ្ហាចំរូងចម្រាសរឿងជក់បារីនេះបានធ្វើឱ្យតារាជាច្រើនបាត់បង់ការងារ និងប្រជាប្រិយភាពដូចជា តារាសម្ដែងស្រី Yang Ying , Zhao Wei , TFBOYS ( សមាជិក២រូបប៊ិះនឹងត្រូវជម្រុះចេញពីក្រុម) និង Wang Yuan សុទ្ធតែរងផលប៉ះពាល់ដល់អាជីពដោយសារតែបញ្ហាបារីទាំងអស់៕
