លោក ទ្រី សក្កដា ឬ អាដា សក្កដា (Ah Da Sakada) ឈ្មោះនេះប្រាកដជាមានអ្នកគាំទ្របទចម្រៀង Original ស្គាល់ច្រើន ព្រោះបទចម្រៀងរបស់លោកបានបំរើអារម្មណ៍អ្នកស្ដាប់មានទាំងបទចម្រៀង មនោសញ្ចេតនា បទញាក់បែបសប្បាយៗ ប៉ុន្តែមួយរយៈចុងក្រោយតារាចម្រៀងរូបនេះបានបាត់ស្ងាត់មុខចេញពីសិល្បៈ។ ថ្មីៗនេះ អាដា សក្កដា បានបង្ហាញវត្តមានជាថ្មីក្នុងសិល្បៈឡើងវិញ ជាមួយគោលបំណងកាន់តែធំ ដែលសាមីខ្លួនបានលើកឡើងថា អ្នកគាំទ្រច្បាស់ជាភ្ញាក់ផ្អើល និង ស្រែក វ៉ាវ គ្រប់ៗគ្នា។
មានឱកាសបានជួបសម្ភាសន៍ជាមួយនឹងបុរសដែលមានទឹកចិត្តស្រលាញ់វិស័យសិល្បៈយ៉ាងធំធេង លោកបានបញ្ជាក់ពីមូលហេតុមួយចំនួនដែលធ្វើឱ្យលោកស្ងាត់បាត់មុខពីសិល្បៈមួយរយៈថា៖
«ជីវិតខ្ញុំមួយរយៈមុនគឺស្ទើអាចនឹងនិយាយបានថាធ្លាក់ដល់លេខ ០ ប្អូនប្រុសបង្កើតមានជំងឺធ្ងន់ ត្រូវទៅសម្រាកព្យាបាលនៅប្រទេសថៃ ដែលតម្រូវឱ្យលក់កេរ្តិ៍អាករមួយចំនួន ព្រោះត្រូវចំណាយប្រាក់ច្រើន ព្រមទាំងចំណាយពេលវេលាដើម្បីទៅមើលថែប្អូនដែលសំរាកនៅមន្ទីរពេទ្យក្រៅស្រុកទៀត។ ក្រៅពីវិបត្តិក្នុងគ្រួសារហើយនោះ ឆាណែល របស់ខ្ញុំដែលខំបង្កើតដោយញើសឈាមត្រូវបាត់បង់ដោយសារតែបញ្ហាការលួចចម្លងកម្មសិទ្ធបញ្ញា សូម្បីតែគណនីហ្វេសប៊ុកដែលខ្ញុំប្រើក៏មិនអាចចូលប្រើការ។ និយាយរួមមួយរយៈមុននេះជីវិតខ្ញុំរងសម្ពាធយ៉ាងខ្លាំង បរាជ័យសព្វគ្រប់បែបយ៉ាង ទាំងបញ្ហាគ្រួសារនិងបញ្ហាផ្ទាល់ខ្លួន ប៉ុន្តែអរគុណដល់ការស្រលាញ់ ការបារម្ភ និង ការយកចិត្តទុកដាក់ពីមនុស្សជុំវិញខ្លួនធ្វើឱ្យខ្ញុំអាចក្រោកឈរឡើងវិញបាន។ ខ្ញុំមកម្ដងនេះ ខ្ញុំមានផែនការធំៗជាច្រើន ជាពិសេសខ្ញុំមាន Project ដ៏ធំមួយដែលនឹងធ្វើឱ្យមជ្ឈដ្ឋានមហាជនភ្ញាក់ផ្អើល។»
យ៉ាងណាមិញផែនការធំ ដែលលោក Ah Da Sakada បានបង្ហើបនោះគឺជា Project ធ្វើឱ្យ មន្ទីពេទ្យកុមារអង្គរ ប៉ុន្តែចំពោះការងារពិស្ដារ លោកសុំលាក់សិនព្រោះស្ថិតក្នុងដំណាក់កាលរៀបចំ ប៉ុន្តែលោកហ៊ានអះអាងថាប្រាកដជាប្លែក និង ពិសេសសម្រាប់ចំណីចក្ខុអ្នកទស្សនាជាក់ជាមិនខាន។
លោក Ah Da Sakada ក៏បានឱ្យដឹងផងដែរថាលោកនិងមិត្តភក្ដិ បានសហការគ្នាបង្កើតជា ផេកហ្វេសប៊ុក និង ឆាណែលយូធូប ដែលមានឈ្មោះថា Somleng Records ដែលនឹងផ្ដោតលើសកម្មភាពផលិតបទចម្រៀង Original ស្នាដៃបង្កើតថ្មីមិនចម្លងគេ ដោយការបង្កើតនេះ ក្នុងគោលបំណងចូលរួមអភិវឌ្ឍវិស័យសិល្បៈកម្ពុជា។ តារាចម្រៀងនិងជាអ្នកនិពន្ធទំនុកភ្លេងមានស្នាដៃល្បីជាច្រើនរូបនេះ ទទួលស្គាល់ថា៖
«លោកមិនរាងចាលឡើយទោះជាធ្លាប់ត្រូវគេ Report បទចម្រៀងរបស់លោកផលិតខ្លួនឯងពីសំណាក់ជនខិលខូចមួយចំនួន ដែលបណ្ដាលឱ្យខូច Channel Youtube បាត់ Page នោះ ព្រោះតែការស្រលាញ់របស់លោកចំពោះសិល្បៈ ដូច្នេះទោះជាលោកចំណាយប្រាក់ពីហោប៉ៅខ្លួនក៏លោកមិនស្ដាយស្រណោះដែរ ដោយសារតែក្នុងបេះដូងលោកមានតែសិល្បៈពេញប្រៀប។»
សម្រាប់អ្នកគាំទ្រកុំភ្លេចរង់ចាំតាមដាន និង ផ្ដល់ជាកម្លាំងចិត្តដល់លោក អាដា សក្កដា តាមរយៈការគាំទ្រស្នាដៃថ្មីៗរបស់លោក នៅលើ Channel youtube និង Facebook page ដើម្បីជាកម្លាំងជំរុញឱ្យលោកមានកម្លាំងផលិត និង ចូលរួមអភិវឌ្ឍវិស័យសិល្បៈខ្មែរ ឱ្យបោះជំហានទៅមុខកាន់តែលឿន និងមានស្ដង់ដារខ្ពស់៕
