ពានរង្វាន់បាល់ទាត់មហាជន ប្រចាំស្រុកល្វាឯមប្រចាំឆ្នាំ២០២៣ បានរៀបចំចាប់ឆ្នោតបែងចែកពូលរួចរាល់ហើយ កាលពីថ្ងៃទី២៨ ខែកុម្ភៈ ឆ្នាំ២០២៣ កន្លងទៅក្រោមត្រួតពិនិត្យនិងធ្វើជាសក្ខីភាពពីសំណាក់លោកបណ្ឌិត កន សុខកាយ អភិបាល នៃគណៈអភិបាលស្រុកល្វាឯម ខេត្តកណ្តាល។
គណៈកម្មការរៀបចំការប្រកួតបានបញ្ជាក់ថា សម្រាប់ការប្រកួតពានរង្វាន់មហាជនប្រចាំឆ្នាំ២០២៣ នេះមានក្រុមចូលរួមចំនួន ១៦ក្រុម មកពីជុំវិញឃុំទាំង១៥ រួមទាំង វិទ្យាល័យទាំង២ នៃស្រុកល្វាឯម ដោយបានបែងចែងជា ៤ពូល ក្នុង១ពូល មានចំនួន៤ក្រុម។
ឆ្លងកាត់ការចាប់ឆ្នោតបែងចែកពូលឃើញថា៖
ពូលA យុវជនអធិរាជជ្រោយពិសី, យុវជនវិទ្យាល័យ ហ៊ុន សែន ពាមឧកញ៉ាអុង, យុវជនឃុំកោះរះ និងយុវជនឃុំសារិកាកែវ
ពូលB យុវជនល្ខោនខោលវត្តស្វាយ, យុវជនឃុំថ្មគរ, យុវជនឃុំភូមិធំ និងយុវជនឃុំកោះកែវ
ពូលC យុវជនឃុំពានឧកញ៉ាអុង, យុវជនឃុំព្រែកឬស្សី, យុវជនឃុំព្រែករៃ និងយុវជនឃុំសំបួរ។
ពូលD យុវជនឃុំល្វាសរ, យុវជនឃុំអរិយក្សត្រ, យុវជនវិទ្យាល័យ ហ៊ុន សែន ទឹកឃ្លាំង និងយុវជនឃុំបឹងគ្រំ
ការប្រកួតពានរង្វាន់បាល់ទាត់មហាជនស្រុកល្វាឯម ឆ្នាំ២០២៣ នេះនឹងធ្វើការប្រកួតជម្រុះទាំង ១៦ក្រុមនៃពូលនីមួយៗ ដែលការប្រកួតនឹងធ្វើឡើងរៀងរាល់ថ្ងៃសៅរ៍ និងអាទិត្យ នៅទីលានវិទ្យាល័យ ហ៊ុន សែន ទឹកឃ្លាំង ដែលស្ថិតនៅភូមិទឹកឃ្លាំង ឃុំទឹកឃ្លាំង ស្រុកល្វាឯម ខេត្តកណ្តាល។ ពានរង្វាន់នេះដែរនឹងរៀបចំក្រោយពេលពានរង្វាន់យុវជនក្រោមអាយុ២២ឆ្នាំបញ្ចប់ទៅ។
គួរំលឹកថា ក្រុមយុវជនអធិរាជជ្រោយពិសី គឺជាក្រុមដែលបានគ្រងជើងឯក នៃពានរង្វានបាល់ទាត់មហាជន ស្រុកល្វាឯមកាលពីឆ្នាំ២០២២ កន្លងទៅ បន្ទាប់ពីបានយកឈ្នះលើក្រុមបាល់ទាត់ យុវជនឃុំអរិយក្សត្រ ដោយលទ្ធផល ៤-១ ធ្វើឲ្យអធិរាជជ្រោយពិសីគ្រងជើងឯកប្រចាំឆ្នាំ២០២២៕