កីឡាករក្បាច់គុនវៀតណាម គ្រោងនឹងបង្ហាញខ្លួននៅក្នុងការប្រកួតកីឡាអាស៊ីអាគ្នេយ៍ (ស៊ីហ្គេម) លើកទី៣២ នាពេលខាងមុខ ដែលពួកគេនឹងចូលរួមប្រកួតក្បាច់គុនល្បុក្កតោប្រពៃណីខ្មែរ។ ព្រឹត្តិការណ៍ហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះក្នុងខែឧសភាខាងមុខនេះ នឹងមានការបង្ហាញក្បាច់គុនល្បុក្កតោប្រពៃណីខ្មែរ ឲ្យអ្នកចូលរួមចូលរួមប្រយុទ្ធដោយដៃ និងប្រើប្រាស់អាវុធជាច្រើនប្រភេទ។
មានដើមកំណើតនៅក្នុងប្រទេសកម្ពុជា ល្បុក្កតោគឺជាក្បាច់គុនប្រយុទ្ធដ៏ចំណាស់បំផុតមួយនៅកម្ពុជា និងបានចុះចូលបញ្ជី UNESCO កាលពីថ្ងៃទី២៩ ខែវិច្ឆិកា ឆ្នាំ២០២២ នៅទីក្រុងរ៉ាបាត នៃព្រះរាជាណាចក្រម៉ារ៉ុក នៅក្នុងកិច្ចប្រជុំលើកទី១៧ នៃគណៈកម្មាធិការអន្តររដ្ឋាភិបាល ដើម្បីការការពារបេតិកភណ្ឌវប្បធម៌អរូបីរបស់អង្គការយូណេស្កូ បានអនុម័តចុះ «គុនល្បុក្កតោ» ក្នុងបញ្ជីតំណាងបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូក្នុងសេចក្តីសម្រេច 17.COM7.b.1។
លោក Le Ngoc Quang អគ្គលេខាធិកាសហព័ន្ធកីឡាក្បាច់គុនបុរាណវៀតណាមបានបង្ហាញភាពជឿជាក់ថា៖ «អត្តពលិកវៀតណាម នឹងអាចប្រើប្រាស់ជំនាញក្បាច់គុនផ្ទាល់ខ្លួនរបស់ពួកគេឱ្យពូកែក្នុងព្រឹត្តិការណ៍ស៊ីហ្គេមលើកទី៣២ នៅកម្ពុជា»។ លោកបានបន្តថាកីឡាករក្បាច់គុនវៀតណាមត្រូវបានរំពឹងថានឹងធ្វើបានល្អ និងមានសក្ដានុពលដើម្បីនាំយកមេដាយមួយចំនួនពីព្រឹត្តុការស៊ីហ្គេម។
លោក Bui Trung Hieu អនុប្រធានសហព័ន្ធកីឡាក្បាច់គុនបុរាណវៀតណាម បានមានប្រសាសន៍ថា៖ «ដើម្បីធានាបាននូវគុណភាពខ្ពស់ សហព័ន្ធបានជ្រើសរើសអត្តពលិកដែលមានសមិទ្ធិផលខ្ពស់ក្នុងព្រឹត្តិការណ៍កីឡាជាតិ នាពេលថ្មីៗនេះ។ ពួកគេនឹងប្រកួតជាមួយនឹងទម្រង់លេងដ៏ល្អបំផុត និងមានភាពជឿជាក់នៅក្នុងការប្រកួតខាងមុខនេះ»។
គួរបញ្ជាក់ថា ព្រឹត្តិការណ៍ស៊ីហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះ គ្រោងនឹងចាប់ផ្ដើមនៅថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ និងការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ នឹងចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣៕
