បន្ទាប់ពីលទ្ធផលនៃការចាប់ឆ្នោតពានរង្វាន់ Merlion Cup 2023 យុវជនអាយុក្រោម២២ឆ្នាំ ក្រុមជម្រើសជាតិកម្ពុជា និងត្រូវប្រកួតជាមួយម៉ាឡេសុី ខណ:ក្រុមម្ចាស់ផ្ទះសិង្ហបុរី និងត្រូវប្រកួតជាមួយ ហុងកុង នៅថ្ងៃទី២៤ ខែមីនា ខាងមុខនេះ នៅកីឡដ្ឋាន Jalan Besar ប្រទេសសិង្ហបុរី ម៉ោង ៤:០០នាទីរសៀល (ម៉ោងនៅកម្ពុជា)។
បើយោងតាមការបញ្ជាក់របស់ សហព័ន្ធកីឡាបាល់ទាត់ម៉ាឡេស៊ី (FAM) បានកំណត់គោដៅយ៉ាងហោចណាស់ឡើងដល់វគ្គផ្តាច់ព្រ័ត្រ សម្រាប់ព្រឹត្តិការណ៍ប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជា ទទួលធ្វើជាម្ចាស់ផ្ទះ នៅរាជធានីភ្នំពេញ គឺដណ្តើមឱ្យបានមេដាយប្រាក់ ឬមាស។
ខណ:លោក E. Elavarasan គ្រូបង្វឹកក្រុមជម្រើសជាតិអាយុក្រោម២២ឆ្នាំ (U22) បាននិយាយថា៖«ឥឡូវនេះជាមួយនឹងក្រុមគ្រូបង្វឹកថ្មី យើងចង់បានសមិទ្ធិផលល្អជាងនេះ យ៉ាងហោចណាស់វគ្គផ្តាច់ព្រ័ត្រនៅស៊ីហ្គេម វាមានសារៈសំខាន់ណាស់ពីទីនោះ យើងអាចគិតពីជំហានបន្ទាប់។ យើងគួរតែមានគោលដៅជាក់លាក់មួយ ដើម្បីឱ្យកីឡាករ និងគ្រូបង្វឹកមានការតាំងចិត្ត»។
ចាប់តាំងពីចូលរួមស៊ីហ្គេមដំបូងនៅ១៩៧៧ ក្រុមជម្រើសជាតិម៉ាឡេស៊ី ធ្លាប់ឈ្នះមេដាយមាស៦លើក ប្រាក់៦លើក និងសំរិទ្ធិ៧លើក សរុប១៩គ្រឿង ក្នុងវិញ្ញាសាបាល់ទាត់ផ្នែកបុរស។
បច្ចុប្បន្នU22ម៉ាឡេស៊ី បានបញ្ចប់ការសាកល្បងកីឡាករចំនួន២៥នាក់ ក្នុងដំណាក់កាលទី២ នៃជំរំហ្វឹកហាត់ពីថ្ងៃទី១៤ ដល់ ថ្ងៃទី១៩ ខែកុម្ភៈ ដែលមានកីឡាករតែ៣នាក់ប៉ុណ្ណោះពីដំណាក់កាលទី១ កាលពីខែវិច្ឆិកា មុនត្រូវបានកោះហៅលើកនេះ៕
