សិល្បៈជាតិ៖ កក្កដា សុភ័ណ្ឌ បានចេញមកបង្ហោះសារនៅលើបណ្ដាញសង្គមហ្វេសប៊ុក ប្រកាសសុំចិត្តដល់មហាជនគ្រប់រូប កុំឱ្យរំលឹកពីស្ថានភាពលោកពីអតីតកាលដែលជាសង្ឃ ស្របពេលដែលខ្លួនកំពុងតែប្រកួតក្នុងកម្មវិធី Miss Queen Cambodia 2023។ លោកថា នេះគឺជាការបំពេញបំណងដែលខ្លួនចង់បានប៉ុណ្ណោះ តើខុសដែរឬទេ?
កក្កដា សុភ័ណ្ឌ បង្ហោះសារយ៉ាងដូច្នោះថា៖ «ខ្ញុំជាក្មេងអត់ម៉ែអត់ឪតាំងពីក្មេងគេចោលខ្ញុំនៅធុងសំរាម ហើយខ្ញុំតស៊ូរស់នៅម្នាក់ឯងតាំងពីក្មេងរហូតមកដល់ពេលនេះ មិនមែនងាយស្រួលទេ ហើយខ្ញុំចង់ដើរតាមក្តីស្រមៃខ្លួនឯងនិងខុសដែរមែនបងប្អូន? សូមកុំយករឿងចាស់ៗ(កាលនៅជាលោក) មកនិយាយទៀតបានអត់? សូមមេត្តាផង»។
ក្រោយការបង្ហោះសារបែបនេះ គេស្រាប់តែឃើញអ្នកនាង ចន ច័ន្ទលក្ខិណា ប្រធានសមាគមសិល្បករខ្មែរ បានលើកឡើងថា ៖ «កុំយកសំដីអ្នកដទៃមកបង្អាក់គោលបំណង និង គោលដៅរបស់ខ្លួនអីអូន អ្នកដែលនិយាយពីអតីតកាលរបស់អូនគឺគាត់កំពុងធ្វើអោយជីវិតខ្លួនគាត់ដើរបកទៅរស់នៅអតីតកាលដែលមិនស្គាល់ភាពរីកចម្រើនក្នុងជីវិត អូនត្រូវតាំងជំហរអោយរឹងមាំ មានម្ចាស់ការ និង ប្រឹងប្រែងតស៊ូសម្រេចគោលដៅខ្លួនឯងអោយបានជោគជ័យ»។
ក្រៅពីនោះ ក៏មានមហាជនអ្នកលេងបណ្ដាញសង្គមជាច្រើននាក់ទៀត ខ្លោចចិត្តអាណិតដល់ កក្កដា សុភ័ណ្ឌ និងបានពោលពាក្យលើកទឹកចិត្តដល់រូបលោកផងដែរ។
យ៉ាងណាមិញ កក្កដា សុភ័ណ្ឌ ក៏បានសុំអំពាវនាវឱ្យមហាជនទាំងអស់ គាំទ្រចំពោះរូបលោកក្នុងការប្រកួត Miss Queen Cambodia 2023 នេះដើម្បីបោះជំហានទៅរកភាពជោគជ័យជាម្ចាស់មកុដ។ សូមជម្រាបកម្មវិធី Miss Queen Cambodia 2023 នឹងធ្វើការប្រកួតផ្តាច់ព្រ័ត្រនៅថ្ងៃទី ៨ ខែមីនា ឆ្នាំ ២០២៣នេះ វេលាម៉ោង ៦-៨យប់៕
