សិល្បៈជាតិ ៖ តារាចម្រៀង នីកូ ទើបតែបញ្ចេញបទចម្រៀងថ្មីដែលមានចំណងជើងថា «រាំរង្វើល» ដើម្បីត្រៀមអបអរពិធីបុណ្យចូលឆ្នាំថ្មីប្រពៃណីខ្មែរដែលកៀកជិតមកដល់ហើយ។ នៅក្នុងនោះដែរ បទថ្មីរបស់លោកត្រូវបានគេសង្កេតឃើញថា មានលាយបញ្ចូលជាមួយចម្រៀងពីល្ខោនអាប៉េ ដែលជាល្ខោនកម្រនឹងសម្ដែងឱ្យមហាជនទស្សនា ព្រមទាំងលាយបញ្ចូលការសម្ដែងរបាំប្រជាប្រិយខ្មែរជាច្រើនទម្រង់ថែមទៀតក្នុង MV តែមួយ។
ត្រង់ប៉ារូលដែលច្រៀងថា «ស្រឡាញ់បងមកឆាប់ៗ អើយស្រឡាញ់បងមកឆាប់ៗ» នោះត្រូវបានដកស្រង់ពីចម្រៀងរបស់ល្ខោនអាប៉េខ្មែរ ដែលជាប្រភេទល្ខោនរៀបតែនឹងរលត់ទៅគ្មានអ្នកស្គាល់។ តាមសម្ដីរបស់លោក នីកូ បានលើកឡើងនៅក្នុងកម្មវិធី 3 FUN ថា ដោយសារតែគ្រួសារលោកជាអ្នកសិល្បៈស្រាប់ ទើបលោកបានស្គាល់ល្ខោននេះទាំងប្រវត្តិ និងការសម្ដែង។ លោកថា នៅក្នុងបទចម្រៀងរបស់លោក បានលើកពីទម្រង់ល្ខោនអាប៉េនេះ ព្រោះចង់បង្ហាញឱ្យអ្នកគាំទ្រ ជាពិសេសមហាជនខ្មែរបានស្គាល់ឡើងពីទម្រង់ល្ខោនអាប៉េ ដែលមានសុទ្ធតែមនុស្សប្រុសសុទ្ធជាអ្នកសម្ដែង បើទោះបីជាត្រូវដើរតួជាស្រីក៏ដោយ។ លោកបន្តថា បទនៅក្នុងល្ខោនអាប៉េ ភាគច្រើនគឺជាប្រភេទបទសប្បាយៗ និងកំប្លុកកំប្លែង។
យ៉ាងណាមិញ MV បទចម្រៀងថ្មីមួយបទនេះ បានចំណាយទុនផលិតអស់ ៣ម៉ឺនដុល្លារ បានរៀបចំផ្ទាំងទស្សនីយភាពប្លែកភ្នែក ដោយមានការសម្ដែងរបាំប្រជាប្រិយខ្មែរជាច្រើនទម្រង់ដូចជា របាំកណ្ដូបសេះ របាំឆៃយ៉ាំ របាំនេសាទ និងរបាំក្ងោកប៉ៃលិន ជាដើម។ លោក នីកូ បានលើកឡើងបន្ថែមថា ការលាយបញ្ចូលរបាំបុរាណ និង ល្បែងប្រជាប្រិយខ្មែរចូលក្នុង MV តែមួយ ព្រោះចង់បង្ហាញពីទំនៀមទំលាប់ប្រពៃណីវប្បធម៌ខ្មែរ ដែលតាំងពីបុរាណកាល ប្រជាជនខ្មែរតែងតែរាំលេងកម្សាន្តសប្បាយនាពេលពិធីបុណ្យចូលឆ្នាំខ្មែរ។
ដោយឡែកអ្វីដែលមហាជនកត់សម្គាល់មួយទៀតនោះគឺ លោក នីកូ បានបញ្ចេញបទចម្រៀងមួយនេះនៅលើឆាណែលយូធូបផ្ទាល់ខ្លួនរបស់លោក ដែលខុសប្លែកពីឆ្នាំមុនៗ លោកបានបញ្ចេញបទចម្រៀងដើម្បីត្រៀមអបអរឱកាសពិធីបុណ្យចូលឆ្នាំខ្មែរនៅក្នុងផលិតកម្មហង្សមាស។
សូមជម្រាបថា «រាំរង្វើល» MV របស់កូនប្រុសពៅនៃត្រកូល ណុប មានការចូលរួមសម្តែងពីសំណាក់សិល្បករ សិល្បការិនីជាច្រើនរូប និងមានការចូលរួមសម្ដែងពីតួឯកស្រី ដាដាវ និងក្រុមរាំវ័យក្មេង ស្រស់ស្អាត និង ស្រស់សង្ហាថែមទៀតផង។ ចង់ដឹង MV នេះប្លែកកម្រិតណានោះ សូមទស្សនាវីដេអូខាងក្រោមនេះ៖
