សិល្បៈជាតិ៖ តារាសម្ដែងស្រី ស៊ីន យូប៊ីន កំពុងក្លាយជាផ្ទាំងស៊ីបសម្រាប់ហ្វេនៗនៅប្រទេសថៃ មិនពេញចិត្តជាខ្លាំង នៅពេលដែលកញ្ញាធ្លោយមាត់បង្ហើបថា ខ្លួនមានមហិច្ឆតាចង់ប្រឡូកសិល្បៈថៃ ព្រោះចង់ទទួលបានបទពិសោធន៍ពីការងារក្នុងរង្វង់សិល្បៈថៃ។ តែថ្មីៗនេះ ហ្វេនថៃកំពុងតែឡាំប៉ាយ៉ាងខ្លាំងដាក់កញ្ញា ស្របពេលដែលពួកគេកំពុងក្ដៅក្រហាយរឿងគុនខ្មែរ។
ដូចបានដឹងមកហើយថា កញ្ញា ស៊ីន យូប៊ីន គឺជាតារាសម្ដែងល្បីឈ្មោះមួយរូបប្រចាំប្រទេសកម្ពុជា និងធ្លាប់មានស្នាដៃសម្ដែងភាពយន្តជាមួយភាគីខាងប្រទេសថៃ តាមរយៈភាពយន្តរឿង «The Protect» និងកម្មវិធីកម្សាន្តផ្សេងៗរបស់ស្ថានីយទូរទស្សន៍ប្រទេសថៃ ថតស្ពតពាណិជ្ជកម្ម និងធ្លាប់ទទួលពានរង្វាន់ផ្សេងៗទៀតនៅប្រទេសថៃជាដើម។ ហើយកន្លងមកថ្មីៗនេះ កញ្ញាធ្លាប់បានចូលរួមការងារបង្ហាញហ្វេសសិនរបស់ក្រុមហ៊ុន «DIOR» នៅលើព្រំក្រហមរួមជាមួយកំពូលតារាថៃគឺ អ្នកនាង Chompoo Ariya នៅប៉ារីសប្រទេសបារាំងថែមទៀត។ ដោយសារស្នាដៃប្រឡូកចូលឆាកអន្តរជាតិទាំងប៉ុន្មាននេះ បានធ្វើឱ្យ កញ្ញា ស៊ីន យូប៊ីន មានចំណងចិត្តចង់ឡូកដៃឱ្យកាន់តែជ្រៅក្នុងពិភពសិល្បៈរបស់ថៃ។
ប៉ុន្តែយ៉ាងណាមិញ បំណងរបស់តារាស្រីរូបនេះ ត្រូវបានហ្វេនថៃកំពុងឡាំប៉ាដូចហែបាតុកម្មនៅលើបណ្ដាញសង្គម បន្ទាប់ពីពួកគេក្ដៅក្រហាយរឿងគុនខ្មែរ។ ហ្វេនថៃហាក់មិនពេញចិត្តជាខ្លាំងខណៈដែលព្រឹត្តិការណ៍ស៊ីហ្គេមលើកទី ៣២ បានដាក់កីឡាគុនខ្មែរចូលក្នុងការប្រកួត ដោយពួកគេសំអាងថា នោះគឺជាម៉ួយថៃ។ មូលហេតុនេះបានបន្តរាលដាលដល់កញ្ញា ស៊ីន យូប៊ីន ហាក់ដូចជាពួកគេចង់បិទផ្លូវរបស់កញ្ញាមិនឱ្យចូលប្រឡូកក្នុងសិល្បៈថៃ។
តាមការលើកឡើងរបស់អ្នកបណ្ដាញសង្គមនៅប្រទេសថៃបាន Comment ថា ៖«មនុស្សភាគច្រើនគង់គិតថា ត្រឹមពាក្យថា គុនខ្មែរ ហោះរំលងមកក៏រំលងទៅចប់ហើយ» «កុំរំអួយពេក មុខមាត់ធម្មតាទេ បើធៀបជាមួយតារាស្រុកយើង គាំទ្រតារាថៃដូចគ្នាប្រសើរជាង តិចប្រយ័ត្នខ្មែរទាមទារមនុស្សរបស់ពួកគេទៀត» «ត្រឡប់ទៅ Clear ជាមួយប្រជាជនរបស់អ្នកជាមុន មិនមែនមិនចេះបែងចែកទេណា សូម្បីតែអ្នកដឹកនាំអ្នកក៏ទាមទារគ្រប់យ៉ាងពីប្រទេសថៃដូចគ្នា» «ត្រឡប់ទៅជជែកជាមួយខ្មែរសិនចា តិចប្រយ័ត្នទាមទារសិល្បៈថៃថាមាននៅលើជញ្ជាំងប្រាសាទអង្គវត្តទៀត នាំតែរវល់» «អ្នកគាំទ្រស្រុកអ្នកនឹងទាមទារអ្នក ប្រសិនបើអ្នកល្បីនៅស្រុកថៃ ខណៈអ្នកនៅមិនទាន់ល្បីនៅស្រុកថៃ អ្នកគាំទ្រអ្នកបានទាមទារឡើងច្រើនហ្មង» «មិនបានទេ ទៅរកស៊ីនៅកន្លែងផ្សេងទៅ កុំថាឡើយទើបឃើញនាងពេលនេះ សូម្បីតែ Miss Grand ខ្មែរចុងក្រោយនេះដែលយើងធ្លាប់គាំទ្រនៅពេលប្រកួត ក៏អស់អារម្មណ៍គាំទ្របន្តទៀតដែរ ក្រោយពេលខ្មែរទាមទារគ្រប់យ៉ាងពីថៃ យើងមិនគាំទ្រទៀតទេ និងមិនព្រមឱ្យមករកស៊ីនៅទឹកដីថៃទៀតដែរ» «ទៅរកស៊ីនៅចិនទៅ កុំមកថៃអី ជនជាតិថៃឈឺចាប់ហើយចាំណា៎»។
សូមជម្រាបថា បើទោះបីជាមានការប្រតិកម្មយ៉ាងខ្លាំងចំពោះ កញ្ញា ស៊ីន យូប៊ីន ពីសំណាក់ហ្វេនថៃ តែមកទល់ពេលនេះនៅមិនទាន់មានការបកស្រាយណាមួយពីកញ្ញា យូប៊ីន នៅឡើយទេ។ ដោយឡែកគ្រប់គ្នារំពឹងថា កញ្ញា ស៊ីន យូប៊ីន អាចនឹងផ្ញើសារល្អៗទៅកាន់អ្នកគាំទ្រថៃឆាប់ៗនេះដើម្បីកុំឱ្យមានការយល់ច្រឡំបន្តទៀត៕
សូមទស្សនាវីដេអូនេះ៖