នៅយប់ថ្ងៃពុធ សប្ដាហ៍នេះ ក្លិបបាល់ទាត់សមាជិកលីគកំពូលអង់គ្លេស English Premier League មាន Everton និង Tottenham Hotspur សុទ្ធតែបានបង្ហាញមុខអ្នកចាត់ការក្រុមថ្មីរៀងៗខ្លួនមុនរដូវកាលឆ្នាំ២០២១-២២ មកដល់នាពេលខាងមុខ។
លោក Nuno Espírito Santo ជនជាតិព័រទុយហ្គាល់ ដែលទើបផុតកិច្ចសន្យាជាមួយក្រុម Wolverhampton Wanderers បានសម្រេចចិត្តចូលរួមក្នុងក្រុម Tottenham Hotspur ក្រោយកៅអីនេះទំនេរមួយរយៈបន្ទាប់ពីក្លិបចែកផ្លូវជាមួយអ្នកចាត់ការទូទៅចាស់ José Mourinho កាលពីខែមេសា កន្លងទៅ។
ចំណែកលោក Rafael Benítez អ្នកចាត់ការទូទៅជនជាតិអេស្ប៉ាញ បានសម្រេចចិត្តទៅចូលរួមជាមួយក្រុម Everton បន្ទាប់ពីលោកទំនេរមួយរយៈក្រោយចាកចេញពីក្រុម Dalian Professional នៅលីគកំពូលប្រទេសចិន។ នេះជាដំណើរទៅកាន់ទីក្រុង Liverpool ឡើងវិញក្រោយពីលោកចាកចេញពីក្លិបបាល់ទាត់ Liverpool កាលពីឆ្នាំ២០១០។ មានអ្នកគាំទ្រមួយចំនួនមិនសូវពេញចិត្តក្នុងដំណើរទៅចូលរួមក្រុម Everton របស់លោក ព្រោះលោកធ្លាប់មានប្រវត្តិដឹកនាំក្រុមគូប្រជែងនាពេលកន្លងទៅ។
អត្ថបទពាក់ព័ន្ធ៖លោក Jose Mourinho រកបានការងារថ្មីហើយ
ពានរង្វាន់English Premier League មានសមាជិកចំនួន២០ក្រុម ហើយនៅសល់តែក្រុម Crystal Palace ប៉ុណ្ណោះដែលរកអ្នកចាត់ការទូទៅក្រុមមិនទាន់ឃើញក្រោយលោក Roy Hodgson ផុតកិច្ចសន្យា៕
