សិល្បៈជាតិ៖ បទចម្រៀង «រាំរង្វើល» ដែលជាបទត្រៀមអបអរចូលឆ្នាំប្រពៃណីខ្មែរនាពេលឆាប់ៗខាងមុខនេះ កំពុងតែទទួលបានការសរសើរយ៉ាងខ្លាំងព្រោះបទចម្រៀងនេះក្រៅពីបង្ហាញទិដ្ឋភាពចូលឆ្នាំខ្មែរហើយនៅរំលេច
របាំជាច្រើនមុខ ជាពិសេសគឺរបាំក្ងោកប៉ៃលិន។
បទចម្រៀងដែលបង្ហាញពីទិដ្ឋភាពបុណ្យចូលឆ្នាំខ្មែរមួយនេះទើបតែត្រូវបានបង្ហោះឱ្យអ្នកគាំទ្រនិងសាធារណជនបានទស្សនាកាលពីថ្ងៃ ៩ ខែ មីនា នេះ ក្រៅពីលោក នីកូ មានការចូលរួមសម្ដែងពីតារាជាច្រើនដួង។ បទចម្រៀងដែលជាស្នាដៃនិពន្ធទំនុកច្រៀងឡើងដោយលោក ណុប អ៊ីនូ ច្រៀងនិងសម្ដែងដោយលោកនីកូ នេះបានរំលេចនូវទិដ្ឋភាពចូលឆ្នាំខ្មែរនៅក្នុងឈុតឆាកជាច្រើន ចងលម្អគោមផ្កាយ លេងល្បែងប្រជាប្រិយ ទាញព្រ័ត្រ វាយក្អម និងរាំរបាំប្រជាប្រិយ ដូចជារបាំនេសាទ របាំគោះត្រលោក របាំឆៃយ៉ាំ របាំកន្តូបសេះ និងជាពិសេស គឺរបាំក្ងោកប៉ៃលិន ដែលលោកនីកូ ជាអ្នករាំដោយផ្ទាល់តែម្ដង។
យ៉ាងណាមិញអ្វីដែលធ្វើឱ្យបទចម្រៀងមានសន្ទុះគាំទ្រច្រើនឡើងជាលំដាប់អាស្រ័យដោយកត្តាខាងលើ ជាពិសេសគុណភាពរូបភាពស្អាតត្រជាក់ភ្នែក ធ្វើឱ្យទស្សនាកាន់តែជក់ចិត្ត មិនអាចដកភ្នែកចេញពីផ្ទាំងទស្សនីយភាពដ៏ល្អឯកនៅក្នុងបទចម្រៀងនេះ ទើបធ្វើឱ្យចំនួនទស្សនានៅលើ Platform Youtube រហូតមកដល់ថ្ងៃទី២៧ មីនា មានចំនួនចូលទស្សនាកើនឡើងរហូតដល់១.៣លានដង។
តាមពិតទៅរបាំក្ងកោករបស់ខ្មែរមានចំនួន៣ប្រភេទផ្សេងៗគ្នាគឺ របាំក្ងោកពោធិ៍សាត់ របាំក្ងោកភ្នំក្រវ៉ាញ និងរបាំក្ងោកប៉ៃលិន។ របាំក្ងោកប៉ៃលិន គឺជារបាំមួយប្រភេទដែលជនជាតិកូឡា និយមលេងនៅក្នុងពិធីបុណ្យផ្សេងៗ ជាពិសេសគឺបុណ្យចូលឆ្នាំប្រពៃណីជាតិតែម្ដង។ របាំក្ងោកប៉ៃលិន ត្រូវបានជនជាតិកូឡា យកទៅសម្ដែងក្នុងពិធីបុណ្យនានា ក្នុងគោលបំណងបង្ហាញពីប្រពៃណី ទំនៀមទម្លាប់ និងចង់បង្កើនបរិយាកាសសប្បាយរីករាយ ជាពិសេសដើម្បីសូមពរជ័យសិរីមង្គលដល់ប្រជាពលរដ្ឋកូឡាគ្រប់ៗរូប។
តែបើយោងតាមរឿងព្រេងនិទាន ដែលប្រជាពលរដ្ឋខេត្តប៉ៃលិនមួយចំនួនបានតំណាលតៗគ្នានោះមានសេចក្ដីថា៖ កាលពីដើម មានរាជបុត្រីក្សត្រមួយអង្គ ទ្រង់សុបិននិម្មិតឃើញក្ងោកឈ្មោលមួយដ៏ស្រស់ស្អាត បានមកប្រោសទេសនាយ៉ាងពីរោះថ្វាយព្រះនាងសណ្ដាប់ ជាហេតុធ្វើឲ្យព្រះនាងចាប់ព្រះទ័យនឹងព្រះធម៌ជាអនេក។ លុះព្រះនាងក្រោកពីផ្ទំទើបដឹងថា តាមពិតនោះគឺជាសុបិន។ ប៉ុន្តែព្រះទ័យរបស់ព្រះនាងនៅតែដក់ជាប់នឹងព្រះធម៌ ហើយថែមទាំងចង់បានក្ងោកនោះមកទេសនាថ្វាយព្រះនាងស្ដាប់រៀងរាល់ថ្ងៃសីលទៀតផង។ ដោយអារម្មណ៍ដក់ជាប់នឹងធម៌ទេសនាខ្លាំងពេក ធ្វើឲ្យព្រះនាងភ្លេចផ្ទំ ភ្លេចសោយ រហូតដល់ធ្លាក់ព្រះកាយប្រឈួន។
ព្រះបិតាព្រះនាង ទ្រង់ព្រួយព្រះទ័យនឹងព្រះរោគរបស់ព្រះនាងជាខ្លាំង ហើយបានត្រាស់សួររកដើមហេតុ។ ក្រោយពេលព្រះនាងបានទូលព្រះបិតាពីដំណើរដើមទងនៃសាច់រឿងរួច ព្រះអង្គក៏បញ្ជាឲ្យព្រានព្រៃខ្លាំងពូកែជាច្រើននាក់តាមចាប់ក្ងោកសីលនោះ ប៉ុន្តែពុំអាចចាប់ក្ងោកសីលនោះបានទេ ព្រោះក្ងោកនោះមានបារមី។ ព្រានបាននឹករកមធ្យោបាយបន្សាបសីលក្ងោកឈ្មោល បន្ទាប់មកទើបចាប់តាមក្រោយ។ គិតរួចព្រានក៏យកក្ងោកញីមួយក្បាល ដោយបង្ហាត់យ៉ាងស្ទាត់ជំនាញ ហើយឲ្យទៅចែចង់ក្ងោកសីលនោះ ទីបំផុតក្ងោកសីលចាញ់កលព្រាន។ ពេលចាប់ក្ងោកបាន ព្រានព្រៃបាននាំក្ងោកសីលទៅថ្វាយព្រះរាជា និងបុត្រីរបស់ព្រះអង្គ ហើយក្ងោកសីលបានសន្យាជាមួយព្រះរាជាថានឹងទៅទេសនាថ្វាយព្រះអង្គ និងបុត្រីរបស់ព្រះអង្គសណ្ដាប់ជារៀងរាល់ថ្ងៃសីល។ ឮដូច្នេះហើយ ព្រះនាងពិតជាមានព្រះទ័យត្រេកអរជាខ្លាំង ហើយបានថ្លែងអំណរគុណក្ងោកសីលនោះ បន្ទាប់មកបានដោះលេងក្ងោកនោះឲ្យមានសេរីភាពវិញ។
គួរសម្គាល់ថា អ្នករាំរបាំក្ងោកប៉ៃលិន តុបតែងកាយដូចជា ពាក់ក្បាលក្ងោកដែលធ្វើពីក្រដាសស្មាច់ ពាក់ស្លាប និងកន្ទុយធ្វើដោយឆ្អឹងឫស្សីពាសដោយសាច់ក្រណាត់លាបពណ៌ ឬគូរគំនូរដូចជាសត្វក្ងោក។ ចំណែកសម្លៀកបំពាក់គ្រឿង តុបតែងលម្អកាយ គឺមានលក្ខណៈដូចសត្វក្ងោកពិតៗ៕
