វីដេអូខ្លីផ្សព្វផ្សាយភាពយន្តខ្នាតធំបែបតន្ត្រីទំនើប «Chinderella» បានបង្ហោះឱ្យអ្នកគាំទ្របានទស្សនាហើយកាលពីថ្ងៃទី៣០ ខែមិថុនា ម្សិលមិញនេះ។ ក្នុងវីដេអូដែលមានរយៈពេលត្រឹម ៣០វិនាទី បានបង្ហាញយ៉ាងច្បាស់ថា Camila Cabello ដែលសម្ដែងជាតួអង្គ Cinderella គឺពិតជាលេចធ្លោ និង ទាក់ទាញខ្លាំងសម្រាប់ស្នាដៃភាពយន្តដំបូងរបស់ខ្លួន។
ក្នុងវីដេអូនោះ Cinderella កំពុងតែដេររ៉ូបហើយនិយាយជាមួយនឹងខ្លួនឯង «ឆាប់ៗនេះមនុស្សគ្រប់គ្នានឹងស្គាល់ឈ្មោះរបស់ខ្ញុំ។ ជីវិតនៅខាងក្រៅបន្ទប់ក្រោមដីនេះនឹងចាប់ផ្ដើមនៅពេលនេះ»
នៅក្នុងវីដេអូនោះតួអង្គអ្នកម្ដាយទេពអប្សរដែលសម្ដែងដោយ Billy Porter ក៏មានបង្ហាញវត្តមានដែរ។
Camila Cabello បានចែករំលែកឃ្លីបវីដេអូខាងលើនៅលើ IG ផ្ទាល់ខ្លួន ព្រមជាមួយនឹងរូប Emoji យំចំនួន៣ ព្រមជាមួយនឹងសំណេរថា៖ «នេះគឺជាបទពិសោធដ៏មហស្ចារ្យបំផុតនៅក្នុងជីវិតខ្ញុំ។ ខ្ញុំអន្ទះសារចង់មើលខ្លាំងណាស់។ ចេញនៅ @amazonprimevideo នៅថ្ងៃទី៣ ខែ កញ្ញា។»
ភាពយន្ត Cinderella និពន្ធ និង ដឹកនាំដោយ Kay Cannon សម្ដែងដោយ Cabello ,Porter, Idina Menzel, Minnie Driver, Pierce Brosnan, James Corden, និង Nicholas Galitzine។
ប្រភព៖ Yardbarker
