ខ្សែបម្រើអន្តរជាតិ John Obi Mikel អតីតសមាជិកក្រុមជម្រើសជាតិនីហ្សេរីយ៉ា ដែលជាសមាជិកក្រុមបាល់ទាត់ Stoke City ក្នុងពានរង្វាន់លីគទី២អង់គ្លេស League Championship ដោយសម្រេចជ្រើសរើសក្រុម Kuwait SC នៅលីគកំពូលនៃប្រទេសគុយវ៉ែត ដែលជាបេក្ខភាពក្នុងពានរង្វាន់បាល់ទាត់កម្រិតទ្វីបអាស៊ី AFC Cup 2021។
នេះជាលើកទី២ហើយដែលកីឡាករវ័យ៣៤ឆ្នាំរូបនេះសម្រេចចិត្តធ្វើដំណើរមកកាន់ទ្វីបអាស៊ី ជាលើកទី២ ខណៈអតីតសមាជិកក្លិប Chelsea រូបនេះធ្លាប់ចូលរួមក្លិបTianjin TEDA របស់ចិន កាលពីឆ្នាំ២០១៧-១៨ កន្លងទៅ។ រូបគេបានចុះកិច្ចសន្យារយៈពេល១ឆ្នាំជាមួយក្លិបថ្មីរបស់ខ្លួន។
អ្នកចាត់ការទូទៅក្រុម Stoke City លោក Michael O’Neill បានថ្លែងនៅក្នុងវិបសាយក្លិបយប់ថ្ងៃសុក្រនេះថា៖«ទោះបីជានេះចូលដល់កិច្ចសន្យាឆ្នាំទី២ ជាមួយ Jonh ក៏ដោយ ប៉ុន្តែយើងយល់ព្រមចំពោះការចាកចេញរបស់គាត់ជាមួយនឹងឱកាសទៅលេងនៅក្រៅប្រទេស ដែលមានសម្រេចគាត់។ គាត់ជាកីឡាករអាជីពមួយរូបដែលបានជួយយើងជាច្រើនក្នុងរដូវកាលមុន ព្រមទាំងនាំកីឡាករក្មេងៗលេងបានច្រើន។ ខ្ញុំរីករាយដែលបានធ្វើការរួមគ្នាជាមួយគាត់ ហើយក៏អរគុណគាត់ក្នុងការជួយយើងកន្លងមក។ សូមជូនពរឱ្យគាត់ជោគជ័យក្នុងពេលខាងមុខ»។
កីឡាករ John Obi Mikel ធ្លាប់ប្រកបអាជីពនៅក្លិប Lyn ចន្លោះឆ្នាំ២០០៤-២០០៦ ហើយនៅឆ្នាំ២០០៦ ដល់២០១៧ រូបគេបានចូលរួមក្លិបតោខៀវ Chelsea របស់អង់គ្លេស ហើយជួយក្រុមឈ្នះពានរង្វាន់ Premier League២ លើក ឈ្នះពាន FA Cup៣លើក ឈ្នះពាន Football League Cup១លើក ឈ្នះពាន FA Community Shield១លើក ឈ្នះពានទ្វីបអឺរ៉ុប UEFA Champions League១ លើកនិងឈ្នះពាន UEFA Europa League១លើក។
នៅឆ្នាំ២០១៧-១៨ រូបគេបានចូលរួមក្រុមTianjin TEDA នៅប្រទេសចិន មុនធ្វើដំណើរត្រឡប់ទៅអង់គ្លេស វិញចូលរួមក្រុម Middlesbrough នៅឆ្នាំ២០១៩ ហើយរដូវកាលបន្ទាប់ទៅចូលរួមក្រុម Trabzonspor នៅទួរគី និងឆ្នាំ២០២០ ចូលរួមជាមួយក្រុម Stoke City នៅអង់គ្លេស វិញ។
កីឡាករកម្ពស់ ១.៨៨រូបនេះ ធ្លាប់ជួយក្រុមជម្រើសជាតិនីហ្សេរីយ៉ា ឈ្នះជើងឯកទ្វីបអាហ្វ្រីក នៅឆ្នាំ២០១៣ ហើយជើងឯករងនៅឆ្នាំ២០០៦,២០១០ និង២០១៩ ព្រមទាំងឈ្នះមេដាយសំរឹទ្ធិកីឡាអូឡាំពិកឆ្នាំ២០១៦ នៅប្រេស៊ីល ផងដែរ។
ដោយឡែកក្លិប Kuwait SC ដែលធ្លាប់ឈ្នះជើងឯកពានរង្វាន់លីគកំពូលគុយវ៉ែត រហូតដល់១៦លើក នៅតិចជាងគូប្រកួតAl-Arabi SC និង Al Qadsia SC ដែលឈ្នះជើងឯកម្នាក់ដល់ទៅ១៧លើកឯណោះ។
អត្ថបទពាក់ព័ន្ធ៖រកឃើញក្រុម៤នៅតំបន់អាស៊ីខាងលិចឆ្លងផុតវគ្គជម្រុះចែកពូលពាន AFC Cup 2021
គុយវ៉ែត ជាប្រទេសនៅតំបន់អាស៊ីខាងលិច ប៉ុន្តែប្រទេសនេះមានកូតាចូលរួមពានរង្វាន់ AFC Cup តែកន្លះកៅអីប៉ុណ្ណោះ ពោលគឺត្រូវប្រកួតជម្រុះមុនសិន ទើបមានឱកាសឡើងទៅវគ្គចែកពូល។ ក្រុម Kuwait SC ដែលជាជើងឯកលីគគុយវ៉ែត ឆ្នាំ២០២០ ត្រូវប្រកួតជម្រុះ ប៉ុន្តែដោយសារមានក្រុមមកពីប្រទេសអូម៉ង់ ដកខ្លួនទើបធ្វើឱ្យក្រុមនេះមានឈ្មោះទៅវគ្គចែកពូលដោយស្វ័យប្រវត្តិ ដោយចូលក្នុងពូល C។
ជាលទ្ធផលក្រុមKuwait SC បានយកឈ្នះគូប្រកួត២លើក និងស្មើ១លើក មានឈ្មោះឡើងទៅលេងវគ្គពាក់កណ្ដាលផ្ដាច់ព្រ័ត្រប្រចាំតំបន់អាស៊ីខាងលិច ដោយត្រូវជួបក្រុមAl-Salt របស់ហ្សកដានី ដែលជាក្រុមលេខ២នៅពូលB រកអ្នកឈ្នះ ដើម្បីចេញទៅប្រកួតជាមួយក្រុមខ្លាំងៗមកពី៤តំបន់ផ្សេងទៀតប្រចាំទ្វីប។ ជើងទី១ Kuwait SC ត្រូវប៉ះ Al-Salt នៅថ្ងៃទី១៣ ខែកញ្ញា និងជើងទី២ នៅថ្ងៃទី២៧ ខែកញ្ញា ឆ្នាំ២០២១៕
