សហព័ន្ធកីឡាបាល់ទាត់កម្ពុជា បានប្រកាសនៅថ្ងៃនេះថា៖«សហព័ន្ធកីឡាបាល់ទាត់កម្ពុជា នឹងធ្វើការប្រកាសអំពីសមាសភាពគ្រូបង្គោលថ្មី នៅចុងសប្ដាហ៍នេះ ដែលនឹងចូលមកដឹកនាំក្រុមជម្រើសជាតិកម្ពុជាឈុតធំ និងឈុតអាយុក្រោម២៣ឆ្នាំ បន្តពីលោក Keisuke Honda ក្រោយចប់ការប្រកួតកីឡាស៊ីហ្គេម ២០២៣ ខាងមុខនេះ»។
ការប្រកាសនេះ ស្របពេលដែលក្រុមជម្រើសជាតិកម្ពុជាអាយុក្រោម២២ឆ្នាំ កំពុងបន្តហ្វឹកហាត់ នៅពហុកីឡដ្ឋានជាតិមរតកតេជោ ក្រោមការដឹកនាំផ្ទាល់របស់អ្នកចាត់ការទូទៅ លោក Keisuke Honda បន្ទាប់ពីបញ្ចប់ការបោះជំរំហ្វឹកហាត់ នៅប្រទេសថៃ និងការចូលរួមប្រកួតពានរង្វាន់ Merlion Cup 2023 នៅសិង្ហបុរី ដោយទទួលបានលេខ៣ កាលពីពេលថ្មីៗ។
ការបង្ហាញវត្តមានបេក្ខភាពគ្រូបង្គោលថ្មីរបស់ក្រុមជម្រើសជាតិបាល់ទាត់កម្ពុជា នាចុងសប្តាហ៍នេះ ក៏ជាការប្រកាសមុនការចាប់ឆ្នោតវគ្គចែកពូលនៃការប្រកួតកីឡាស៊ីហ្គេម ឆ្នាំ២០២៣ ប្រភេទកីឡាបាល់ទាត់ ទាំងផ្នែកបុរស និងនារី នឹងត្រូវធ្វើឡើងនៅថ្ងៃទី០៥ ខែមេសា ឆ្នាំ២០២៣ នៅពហុកីឡដ្ឋានជាតិ មរតកតេជោ។
សូមបញ្ជាក់ផងដែរថា ប្រភេទកីឡាបាល់ទាត់ នៅក្នុងព្រឹត្តិការណ៍ស៊ីហ្គេមលើកទី៣២ នឹងចាប់ផ្ដើមការប្រកួតជម្រុះចាប់ពីថ្ងៃទី២៩ ខែមេសា តទៅ រីឯពិធីបើកផ្លូវការរបស់ស៊ីហ្គេម លើកទី៣២ នឹងត្រូវធ្វើនៅថ្ងៃទី៥ ខែឧសភា និងបញ្ចប់ នៅថ្ងៃទី១៧ ខែឧសភា។ ខណៈព្រឹត្តិការណ៍ស៊ីហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះ គ្រោងនឹងចាប់ផ្ដើមនៅថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ និងការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ នឹងចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣៕