សិល្បៈជាតិ៖ ម៉ូដហ្វេហ្សិនមួយគឺជា «ឈុតសំរាម» ត្រូវបានបុរសម្នាក់ស្លៀកពាក់ឈុតនេះ ដើរបង្ហាញនៅក្នុងបរិវេណកម្មវិធីពិព័រណ៍ស្នាដៃនិស្សិតនៅលើសាលារចនា ឬ សកលវិទ្យាភូមិន្ទវិចិត្រសិល្បៈ។ ហ្វេហ្សិនមួយនេះ ត្រូវបានផ្សព្វផ្សាយអំពីការស្រឡាញ់ និងថែរក្សាបរិស្ថាន ជាពិសេសចំពោះប្រភេទសំរាមសំណល់រឹងដូចជា ថង់ប្លាស្ទិក ដបទឹកសុទ្ធ និងវត្ថុជ័រដែលបានប្រើប្រាស់រួច ត្រូវមានការទុកដាក់ក្នុងធុងសំរាមយ៉ាងត្រឹមត្រូវ។
តាមរយៈលោក ង៉ែត រ៉ាឌី ដែលបានផ្សព្វផ្សាយពីរូបភាពទាំងអស់នេះ នៅលើបណ្ដាញសង្គមហ្វេសប៊ុកបានរៀបរាប់ខ្លឹមសារថា ៖ «តាមរយៈរូបថតប៉ុន្មានសន្លឹកនេះតើអ្នកឃើញយ៉ាងដូចម្តេចដែរ? បើស្រលាញ់បរិស្ថានសូមកាត់បន្ថយការប្រើប្រាស់ប្លាស្ទីក និងទុកដាក់ពួកវាឱ្យបានត្រឹមត្រូវ។ អរគុណ ថ្ងៃនេះជាថ្ងៃចុងក្រសម្រាប់កម្មវិធីរបស់យើងហើយ។ ខ្ញុំជឿថាបើបងប្អូនអត់បានមកនោះពិជាស្តាយមិនខាន ដូច្នេះកុំឱ្យវេលានេះកន្លងហួសណា»។
លោក ង៉ែត រ៉ាឌី បានបញ្ជាក់ថា នេះគឺជាគំនិតច្នៃប្រឌិតហ្វេហ្សិនរបស់លោក ដោយលោកមានគោលបំណងចង់ឱ្យអ្នកចូលរួមដើរមើលពិព័រណ៍ស្នាដៃនិស្សិតនៅសាលារចនា មានការយកចិត្តទុកដាក់ក្នុងការគ្រប់គ្រងសំរាម ដោយចៀសវាងការចោលសំរាមពេសវាលពាសកាល។
រូបភាពទាំងអស់នេះ ក៏ជាសារផ្សព្វផ្សាយយ៉ាងសំខាន់មួយទៅកាន់ សិស្ស និស្សិត និងមហាជនទាំងអស់ ដើម្បីលើកកម្ពស់សោភណ្ឌភាព ការរក្សាសណ្ដាប់ធ្នាប់ អនាម័យសាធារណៈ និងទប់ស្កាត់ការបំពុល ទឹក ដី ខ្យល់ នាឱកាសសប្បាយរីករាយតាមរយៈកម្មវិធីសង្ក្រាន្តផ្សេងៗ ដែលធ្វើឡើងនៅតាមសាលានានា។
បើតាមតួរលេខជាក់លាក់ពីក្រសួងបរិស្ថានបានឱ្យដឹងថា នៅឆ្នាំ ២០២២ សំរាមដែលបានបង្កើតឡើងនៅក្នុងប្រទេសកម្ពុជាបានកើនឡើងជាង ៤លានតោននៅក្នុង ១ ឆ្នាំៗ។ ហើយក្នុងនោះ ១ ថ្ងៃ សំរាមមានជាង ១ ម៉ឺនតោន ដែលកម្រិតនៃការកើនឡើងសំណល់រឹងសំរាមនៅប្រទេសកម្ពុជា គឺមានចន្លោះពី ១០ ទៅ ១៥ ភាគរយនៅក្នុង ១ ឆ្នាំ។
ត្រឡប់មកវិញ សង្ក្រាន្តនៅតាមសាលាពិតជាធ្វើឱ្យមហាជនទាំងអស់គ្នាមានភាពសប្បាយរីករាយមែន ប៉ុន្តែក្រោយពីសប្បាយហើយ អ្នកក៏ត្រូវគិតអំពីការថែរក្សាអនាម័យ និងសណ្ដាប់ធ្នាប់សាធារណៈផងដែរ ដើម្បីឱ្យអ្នកមកលេង ឬចូលរួមបន្ទាប់ ទទួលបានអារម្មណ៍ស្រស់ស្រាយ គ្មានគំនរសំរាម គ្មានក្លិនស្អុយជាដើម៕