នាព្រឹកថ្ងៃទី ១១ ខែ មេសា ឆ្នាំ ២០២៣ នេះ តំណាងស្ថាប័ន Guinness World Record បានមកដល់ក្រុង សៀមរាប ដើម្បីត្រួតពិនិត្យ និង រាប់ «បេះដូងច្រើនជាងគេលើពិភពលោក» ដែលតាំងបង្ហាញនៅខាងមុខប្រាសាទអង្គរវត្ត ដើម្បីដាក់បញ្ជូលក្នុងការបំបែកឯតទគ្គកម្មពិភពលោក ហ្គីនណេស។
យោងតាមគេហទំព័រហ្វេសប៊ុករបស់ សហភាពសហព័ន្ធយុវជនកម្ពុជា បានឲ្យដឹងថា ការបំបែកឯតទគ្គកម្ម «បេះដូងច្រើនជាងគេលើពិភពលោក» នឹងធ្វើឡើងជាផ្លូវការនាថ្ងៃទី ១១ ខែ មេសា ឆ្នាំ២០២៣ វេលាម៉ោង ៤រសៀលតទៅ នៅបរិវេណប្រាសាទអង្គរវត្ត។ ដូច្នេះ សូមអញ្ជើញបងប្អូនប្រជាពលរដ្ឋចូលរួមទាំងអស់គ្នាដើម្បីជាសក្ខីភាពនៃការបំបែកឯតទគ្គកម្មពិភពលោកនេះ។
កាលពីថ្ងៃទី ០៩ ខែ កុម្ភៈ ឆ្នាំ ២០១៩ ចក្រភពអង់គ្លេសធ្លាប់បានបំបែកកំណត់ត្រាបេះដូងក្រដាស (Largest display of orgami hearts) ចំនួន ៥៣,៧០៤ ដោយមានការចូលរួមពីមនុស្សរាប់ពាន់នាក់មកពីសហគមន៍ជាង ៤០តំបន់ នៅក្នុងតំបន់ Medway និង Kent។ គម្រោងនេះត្រូវបានកាន់កាប់ដោយគម្រោង Paper Hearts Project ក្នុងទីក្រុង Chatham នៃចក្រភពអង់គ្លេស ក្រោមការដឹកនាំរបស់ក្រុមនិស្សិតផ្នែកវិទ្យាសាស្រ្តកីឡា និង លំហាត់ប្រាណ នៃសាកលវិទ្យាល័យ Kent នេះបើយោងតាមការបង្ហោះរបស់គេហទំព័រ Guinness World Record។ ប្រភព៖ Guinness World Record
សូមជម្រាបថា នេះមិនមែនជាលើកទី១ទេ ដែលប្រទេស កម្ពុជា បានបំបែកកំណត់ត្រាធំៗលំដាប់ថ្នាក់ពិភពលោក ដោយកន្លងមក កម្ពុជា ធ្លាប់បានបំបែកកំណត់ត្រាពិភពលោកជាច្រើនរួមមានដូចជា៖ ការផលិតទូកង មានប្រវែងវែងជាងគេ , ចាប៉ីដងវែងខ្នាតយក្ស , ការរាំចង្វាក់ម៉ាឌីហ្សុន , នំអន្សមយក្ស និងចុងក្រោយ គឺ ក្រមាវែងជាងគេលើពិភពលោក៕
