ទូរទស្សន៍ OneFootball បានទិញសិទ្ធិផ្សាយបន្តផ្ទាល់ពីការប្រកួតបាល់ទាត់ក្នុងពានរង្វាន់លីគកំពូលនៃប្រទេសជប៉ុន2021 MEIJI YASUDA J1 LEAGUE ទៅកាន់៣ប្រទេសទៀត ក្នុងទ្វីបអឺរ៉ុប រួមមានប្រទេសអ៊ីតាលី ប្រទេសសាន់ម៉ារីណូ និងបុរីវ៉ាទីកង់។
គេហទំព័រ jleague.co របស់លីគកំពូលជប៉ុន បញ្ជាក់ថាការផ្សាយបន្តផ្ទាល់ទៅកាន់៣ប្រទេសនេះនឹងចាប់ដំណើរការពីថ្ងៃទី៣០ ខែកក្កដា នេះតទៅ។
សូមបញ្ជាក់ថាកាលពីពាក់កណ្ដាលខែមិថុនា កន្លងទៅទូរទស្សន៍ Sony Pictures Networks របស់ប្រទេសឥណ្ឌា បានទិញសិទ្ធិផ្សាយបន្តផ្ទាល់ពីការប្រកួតក្នុងពានរង្វាន់លីគកំពូលនៃប្រទេសជប៉ុន ទៅកាន់៨ប្រទេសរួមមានប្រទេសឥណ្ឌា,បង់ក្លាដេស,ប៊ូតាន់, អាហ្វហ្គានីស្ថាន,ម៉ាល់ឌីវ,នេប៉ាល់,ប៉ាគីស្ថាននិងស្រីលង្កា។
អត្ថបទពាក់ព័ន្ធ៖ទូរទស្សន៍មួយទិញសិទ្ធិផ្សាយលីគកំពូលជប៉ុន ទៅ៨ប្រទេស ធ្វើឱ្យកើនឡើងជាង៦០ប្រទេស
តាមផែនការពានរង្វាន់ 2021 MEIJI YASUDA J1 LEAGUE នឹងប្រកួតពីថ្ងៃទី២៦ ខែកុម្ភៈ ដល់ថ្ងៃទី៤ ខែធ្នូ ឆ្នាំ២០២១ ដែលមាន១៩៩ប្រកួត។ ក្រោយប្រកួតវិលជុំសន្សំពិន្ទុរវាងក្រុមទាំង២០ ចំនួន២ជើងចប់ ក្រុមដែលមានពិន្ទុច្រើនជាងគេជាម្ចាស់ជើងឯកប្រចាំរដូវកាលហើយ មានឈ្មោះចូលរួមប្រកួតពានរង្វាន់ FIFA Club Word Cup ផងដែរ។ ក្រុមចំណាត់ថ្នាក់លេខ១ដល់លេខ៣ មានឈ្មោះចេញទៅប្រកួតពានរង្វាន់ជើងឯកកម្រិតទ្វីប AFC Champion League ខណៈក្រុមបាតតារាងចំនួន៤ក្រុមត្រូវធ្លាក់ទៅលេងពានរង្វាន់កម្រិតទី២ J2 League នៅរដូវកាលបន្ទាប់៕
