សិល្បៈជាតិ៖ នៅរាត្រីថ្ងៃទី ១៦ មេសា ត្រូវនឹងថ្ងៃទី៣ នៃថ្ងៃបញ្ចប់ព្រឹត្តិការណ៍ចូលឆ្នាំបន្ទាយឆ្មារ វត្តមានលោកជំទាវ ឧកញ៉ា ហេមចិត្តាអគ្គមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ កែ គឹមយ៉ាន និងគណៈប្រតិភូបានអញ្ជើញចូលរួមក្នុងពិធីបណ្ដែតគោមទឹក នាបរិវេណកសិន្ធព្រះគង្គាជុំវិញប្រាសាទបន្ទាយឆ្មារ។
សូមជម្រាបថា បើតាមន័យ «គោម» ឬ «ប្រទីប» គឺសំដៅដល់គ្រឿងដុតបំភ្លឺ រួមមានចង្កៀង គោម ទៀន និងចន្លុះជាដើម។ ហើយអត្ថន័យម្យ៉ាងទៀតនៃពាក្យ «ប្រទីប» គឺឧបករណ៍សម្ភារៈដែលធ្វើជាគ្រោង ឬជារូបផ្សេងៗ ដាក់លើទូកលាត ឬលើក្បូន ប្រកបដោយគ្រឿងអុជបំភ្លឺព្រោងព្រាយបណ្ដែតលើទឹកជាដើម។ ចំពោះទំនៀមរបស់ពលរដ្ឋពុទ្ធបរិស័ទក្នុងការប្រារព្ធពិធីបណ្ដែតគោមទឹក ឬ ប្រទីប ក៏ជាមួយផ្នែកជាការឧទ្ទិសបូជាចំពោះព្រះចង្កូមកែវ ពោលគឺធ្មេញចង្កូមនៃព្រះសម្មាសម្ពុទ្ធសមណគោតម។
គួរជម្រាបដែរថា នេះជាលើកដំបូងបំផុត នៃការរៀបចំកម្មវិធីចូលឆ្នាំបន្ទាយឆ្មារ ដែលជាព្រឹត្តិការណ៍ដ៏ធំមិនធ្លាប់មាន នៅប្រាសាទបន្ទាយឆ្មារ ស្ថិតនៅស្រុកថ្មពួក ខេត្តបន្ទាយមានជ័យ។ បើទោះបីពិធីបុណ្យចូលឆ្នាំប្រពៃណីខ្មែរគឺប្រព្រឹត្តិទៅរយៈពេល៣ថ្ងៃ ប៉ុន្ដែការរៀបចំចូលឆ្នាំបន្ទាយឆ្មារ នៅខេត្តបន្ទាយមានជ័យមានរយៈពេល៤ថ្ងៃ គិតចាប់ពីថ្ងៃទី១៣,១៤,១៥ និង១៦ ខែមេសា ឆ្នាំ២០២៣ ក្រោមប្រធានបទ «ជួបជុំគ្រួសារ ចូលឆ្នាំបន្ទាយឆ្មារ ក្រោមម្លប់សន្ដិភាព!»៕