ម្ចាស់មេដាយមាស ២សម័យកាលសិង្ហបុរី ផ្នែកកីឡារត់ម៉ារ៉ាតុន កីឡាករ Soh Rui Yong បាននិយាយពីកីឡាកររត់ម៉ារ៉ាតុងកម្ពុជា ហែម ប៊ុនទីង ថា៖« ការមកកម្ពុជាសម្រាប់ស៊ីហ្គេម ឆ្នាំនេះមានចំណុចពិសេសមួយសម្រាប់ខ្ញុំព្រោះខ្ញុំបាន ក្រឡេកមើលរឿង ហែម ប៊ុនទីង កាលពីខ្ញុំអាយុ ១៧ឆ្នាំ ហើយបានអានអត្ថបទពីការចុះផ្សាយរបស់ BBCកាល ពីឆ្នាំ២០០៨»។
លោក ហែម ប៊ុនទីង រស់នៅក្នុង “ស្តាតអូឡាំពិក ក្នុង រាជធានីភ្នំពេញ” ខណៈពេលដែលគាត់ជម្នះភាពក្រីក្រខ្លាំង ដើម្បីតំណាងឱ្យប្រទេសកម្ពុជាក្នុងការប្រកួតអន្តរជាតិ ដូចជាស៊ីហ្គេម ដែលគាត់បានឈ្នះមេដាយប្រាក់មួយ (ម៉ារ៉ាតុង ២០០៧) និងសំរឹទ្ធ២ វិញ្ញាសា 5000m វិញ្ញាសា Marathon នៅឆ្នាំ២០០៩។ លោកក៏បានតំណាងឲ្យប្រទេសកម្ពុជាក្នុងការ ប្រកួតកីឡាអូឡាំពិកទីក្រុងប៉េកាំងឆ្នាំ២០០៨ ផងដែរ។
Soh Rui Yong បានបញ្ជាក់ថា៖ «លោក ហែម ប៊ុនទីង បានបំផុសគំនិតខ្ញុំយ៉ាងខ្លាំងជាមួយ នឹង ចំណង់ ចំណូលចិត្តរបស់គាត់ចំពោះកីឡា និងការតស៊ូរបស់គាត់ដើម្បីជំនះរាល់ឧបសគ្គ។ ខ្ញុំបាន ដឹងថាខ្ញុំមានសំណាងណាស់នៅក្នុងជីវិតបើប្រៀបធៀបទៅនឹងអត្តពលិកដូចជាខ្លួនគាត់ ហើយ ខ្ញុំថែមទាំងត្រូវបានជំរុញឱ្យប្រើប្រាស់ឱកាសរបស់ខ្ញុំដើម្បីជោគជ័យសម្រាប់ប្រទេសរបស់ខ្ញុំ។ នៅ ទីបំផុត ខ្ញុំបានឈ្នះមេដាយមាសស៊ីហ្គេមម៉ារ៉ាតុងចំនួនពីរនៅក្នុងឆ្នាំ ២០១៥ និង២០១៧។ ភាពជោគជ័យនេះ ចាប់ផ្តើមដោយការបំផុសគំនិតពីលោក ហែម ប៊ុនធីង»។
កីឡាករ Soh Rui Yong ក៏បានប្រកាសចង់ជួបលោក ហែម ប៊ុនធីង នៅពេលមកចូលរួមប្រកួតកីឡាស៊ីហ្គេមនៅកម្ពុជា ថា៖ «មិនដឹងថាគាត់នៅម្តុំភ្នុំពេញទេ តែបើមានអ្នកមកពីស្រុកខ្មែរបានអានរឿងនេះ សូមប្រាប់គាត់ផង ខ្ញុំពិតជាចង់ជួបគាត់ដោយផ្ទាល់!» ជួបគ្នានៅប្រទេសកម្ពុជានៅថ្ងៃទី០៦ ឧសភា»។
គួរបញ្ជាក់ថា លោក ហែម ប៊ុនទីង គឺជាកីឡាកររត់ម៉ារ៉ាតុងកម្ពុជា លោកកើតថ្ងៃទី ១២ ខែ ធ្នូ ឆ្នាំ ១៩៨៥ មានស្រុកកំណើតមកពីគ្រួសារកសិករក្នុងខេត្តស្ទឹងត្រែង។ លោកធ្លាប់តំណាងកម្ពុជាចូលរួមប្រកួតកីឡាអាស៊ីអាគ្នេយ៍ និងបានឈ្នះមេដាយប្រាក់ ក្នុងការរត់ម៉ារ៉ាតុង និងមេដាយសំរឹទ្ធមួយក្នុងការរត់ប្រណាំងចម្ងាយ ៥០០០ ម៉ែត្រ ក្នុងព្រឹត្តិការណ៍កីឡាអាស៊ីអាគ្នេយ៍ឆ្នាំ ២០០៧។
លោក ហែម ប៊ុនទីង ក៏ធ្លាប់បានតំណាងឱ្យប្រទេសកម្ពុជាក្នុងការរត់ម៉ារ៉ាតុងនៅឯកីឡាអូឡាំពិករដូវក្តៅឆ្នាំ២០០៨ នៅទីក្រុងប៉េកាំង ដោយបានបញ្ចប់ក្នុងចំណាត់ថ្នាក់ទី៧៣ នៅថេរវេលា ២:៣៣:៣២វិនាទី។ ក្រោយមកលោក បានបំបែកំណត់ត្រាថ្មី ឈ្នះមេដាយសំរឹទ្ធ នៅក្នុងអំឡុងការប្រកួតកីឡាអាស៊ីអាគ្នេយ៍ឆ្នាំ២០០៩ នៅទីក្រុងវៀនច័ន្ទន៍ ប្រទេសឡាវ៕