ក្រុមបាល់ទាត់ជម្រើសជាតិទីម័រខាងកើត កំពុងសំងំហ្វឹកហាត់នៅប្រទេសថៃ មុនបន្តដំណើរមកចូលរួមស៊ីហ្គេម លើកទី៣២ នៅរាជធានីភ្នំពេញ ខណៈក្រុមមួយនេះនឹងត្រូវប្រកួតបើកឆាកប៉ះម្ចាស់ផ្ទះកម្ពុជា ក្នុងពូល A នាចុងខែមេសា ខាងមុខ។
សម្រាប់ក្រុមជម្រើសជាតិទីម័រ អាយុ២២ឆ្នាំ ដឹកនាំដោយលោក Park Soon Tae ជនជាតិកូរ៉េខាងត្បូង បានណាត់ក្លិបមួយចំនួនរបស់ប្រទេសថៃ ប្រកួតមិត្តភាពកម្ដៅសាច់ដុំក្រៅផ្លូវការ ក្រៅពីហ្វឹកហាត់បច្ចេកទេសនៅក្រៅប្រទេសរបស់ខ្លួន។
បើតាមការចេញផ្សាយរបស់សារព័ត៌មាន TATOLI របស់ទីម័រខាងកើត បញ្ជាក់ថាសហព័ន្ធបាល់ទាត់របស់ប្រទេសខ្លួន បានចំណាយទឹកប្រាក់ ២០០,០០០០ ដុល្លារសម្រាប់ការចំណាយទូទៅ ទាំងការហ្វឹកហាត់ និងការត្រៀមខ្លួន មុនធ្វើដំណើរមកចូលរួមព្រឹត្តិការណ៍ស៊ីហ្គេម នៅកម្ពុជា។
តាមគម្រោងក្រុមជម្រើសជាតិទីម័រ នឹងចាក់ចេញពីប្រទេសថៃ នៅថ្ងៃទី២៧ ខែមេសា ឆ្នាំ២០២៣ ឆ្ពោះមកកាន់ទីក្រុងភ្នំពេញ ប្រទេសកម្ពុជា ដើម្បីត្រៀមខ្លួនប្រកួតស៊ីហ្គេម ។
គួរបញ្ជាក់ថា ក្រុមជម្រើជាតិទីម័រ ស្ថិតនៅពូល A ជាមួយម្ចាស់កម្ពុជា មីយ៉ានម៉ា ឥណ្ឌូនេស៊ី និងហ្វីលីពីន ដោយក្រុមជម្រើសជាតិទីម័រ នឹងត្រូវជួបជាមួយក្រុមជម្រើសជាតិកម្ពុជា នៅថ្ងៃទី២៩ ខែមេសា ឆ្នាំ២០២៣ ដែលការប្រកួតធ្វើឡើងនៅពហុកីឡដ្ឋានអូឡាំពិក៕