បិទវគ្គចុងក្រោយហើយនៅថ្ងៃសុក្រ សប្ដាហ៍មុននេះ គណៈកម្មការអូឡាំពិកម៉ាឡេស៊ី បានបញ្ជាក់ថាអត្តពលិករបស់ខ្លួនចំនួន៣០រូប ទទួលសំបុត្រយន្តហោះទៅប្រកួតកីឡាអូឡាំពិករដូវក្ដៅ នៅប្រទេសជប៉ុន Olympic Games 2020 ក្នុងចុងខែកក្កដា ខាងមុខនេះ។
អត្តពលិក៣០រូបនេះមានបុរស ១២ រូប នារី១៨រូប ប្រកួតក្នុង១០ប្រភេទកីឡាផ្សេងៗគ្នាក្នុងនោះមាន បាញ់ធ្នូ,អត្តពលិកម្ម,វាយសី,ជិះកង់,លោតទឹក,វាយកូនគោល,កាយសម្ព័ន្ធ, ប្រណាំងទូកក្ដោង,បាញ់កាំភ្លើង និងហែលទឹក។
អត្ថបទពាក់ព័ន្ធ៖អូឡាំពិក៖ប្រទេសអាស៊ាន៦បញ្ជូនអត្តពលិកលើស១០រូប តែ៥ប្រទេសបញ្ជូនទៅក្រោម៣រូប
ព្រឹត្តិការណ៍កីឡាអូឡាំពិករដូវក្តៅ ដែលធ្វើនៅរាជធានីតូក្យូ នេះមានការចូលរួមពីកីឡាករកីឡាការិនី ពីប្រទេស/តំបន់ចំនួន២០៦ផ្សេងគ្នា សរុបប្រមាណជា១១,០០០នាក់ លើប្រភេទ៣៣កីឡានិង៣៣៩វិញ្ញាសា។ ការប្រកួតគ្រោងចាប់ធ្វើពីថ្ងៃទី២៣ ខែកក្កដា ដល់ថ្ងៃទី៨ ខែសីហា ឆ្នាំ២០២១។ ការប្រកួតនេះបានលើកពេលពីឆ្នាំ២០២០ កន្លងមកដោយសារការឆ្លងនៃជំងឺកូវីដ-១៩ ជុំវិញពិភពលោក៕