ក្រុមបាល់ទាត់ជម្រើសជាតិមីយ៉ាន់ម៉ា បានបញ្ចប់ការហ្វឹកហាត់នៅប្រទេសថៃ ដំណាក់កាលចុងក្រោយមុនបន្តដំណើរមកចូលរួមស៊ីហ្គេម លើកទី៣២ នៅរាជធានីភ្នំពេញ ខណៈក្រុមមួយនេះនឹងត្រូវប្រកួតប៉ះក្រុមជម្រើសជាតិទីម័រខាងកើត ក្នុងពូល A នៅថ្ងៃទី២ ខែឧសភា ខាងមុខ។
សម្រាប់ក្រុមជម្រើសជាតិមីយ៉ាន់ម៉ា អាយុ២២ឆ្នាំ ក្រោមការដឹកនាំដោយលោក Michael Feichtenbeiner គ្រូបង្វឹកជនជាតិអាល្លឺម៉ង់ គឺបានចាប់ផ្តើមហ្វឹកហាត់ចំនួន ១០ថ្ងៃ ពោលគឺចាប់ពីថ្ងៃទី១០ ដល់ថ្ងៃទី២០ ខែមេសា ឆ្នាំ២០២៣ ដោយបានហ្វឹកហាត់ និងបានណាត់ក្លិបមួយចំនួនរបស់ប្រទេសថៃ ប្រកួតមិត្តភាពកម្ដៅសាច់ដុំក្រៅផ្លូវការ ក្រៅពីហ្វឹកហាត់បច្ចេកទេសនៅក្រៅប្រទេសរបស់ខ្លួន។
លទ្ធផលការប្រកួតកម្តៅសាច់ដុំរបស់ក្រុមជម្រើសជាតិមីយ៉ាន់ម៉ា៖
U22 មីយ៉ាន់ម៉ា ១-០ បាងកក អេហ្វស៊ី
U22 មីយ៉ាន់ម៉ា ១-៤ សាម៉ុតសងក្រាម
U22 មីយ៉ាន់ម៉ា ០-៤ រដ្ឋឆាបូរី អេហ្វស៊ី
U22 មីយ៉ាន់ម៉ា ០-២ ឃោស្តុំ យូណាយធីត
គួរបញ្ជាក់ថា ក្រុមជម្រើសជាតិមីយ៉ាន់ម៉ា ស្ថិតនៅពូល A ជាមួយម្ចាស់កម្ពុជា ទីម័រខាងកើត ឥណ្ឌូនេស៊ី និងហ្វីលីពីន ដោយក្រុមជម្រើសជាតិមីយ៉ាន់ម៉ា នឹងត្រូវជួបជាមួយក្រុមជម្រើសជាតិទីម័រខាងកើត នៅថ្ងៃទី២ ខែឧសភា ឆ្នាំ២០២៣ ដែលការប្រកួតធ្វើឡើងនៅពហុកីឡដ្ឋានអូឡាំពិក៕
