សិល្បៈអន្តរជាតិ៖ អ្នកស្រី Frances Yip ថ្វីត្បិតតែបច្ចុប្បន្នមានជន្មាយុ ៧២ឆ្នាំក្ដី ប៉ុន្តែទឹកដមសំឡេងដ៏ពីរោះ និងថាមពលសំឡេងខ្លាំងគ្មានគូប្រៀបនៅតែរក្សាបានយ៉ាងល្អ ព្រោះនៅក្នុងកម្មវិធីនានាដែលអ្នកចម្រៀងវ័យចំណាស់រូបនេះទៅចូលរួម ក្នុងឆ្នាំ២០២៣នេះ ធ្វើឱ្យអ្នកគាំទ្រទទួលស្គាល់ថា ពេលវេលាកន្លងទៅយូរប៉ុណ្ណា តែសំឡេងរបស់អ្នកស្រីនៅតែរក្សាដូចដើម។
«បងធំនៅក្រុងសៀងហៃ» គឺជាខ្សែភាពយន្តចិនដ៏ល្បីល្បាញបំផុតកាលពីឆ្នាំ១៩៨០ ដែលរឿងនោះចូលរួមសម្ដែងដោយតារាល្បីដូចជា Chow Yun Fat, Ray Lui និង Angie Chiu។ មិនត្រឹមតែសាច់រឿងនោះទេដែលឆក់យកបេះដូងអ្នកទស្សនាដែលនិយមភាពយន្តចិន សូម្បីតែបទចម្រៀងក៏បានសន្ដំអ្នកស្ដាប់ឱ្យឈ្លក់វង្វេងនឹងទឹកដមសំឡេងដ៏ក្រអួនក្រអៅ និងមានថាមពលរបស់អ្នកស្រី Frances Yip រហូតបទនេះ បានក្លាយជាបទចម្រៀងជាប្រវត្តិសាស្ត្រ ដែលត្រូវបានអ្នកចម្រៀងចាស់ក្មេងលើកយកមកបកស្រាយនៅក្នុងឱកាសផ្សេងរហូតមកទល់នឹងបច្ចុប្បន្ននេះ។
កន្លងទៅ៤៣ឆ្នាំ ពោលនៅក្នុងឆ្នាំ២០២៣នេះ អ្នកស្រី Frances Yip ដែលមានវ័យក្បាល៧០ទៅហើយនោះ បានបង្ហាញវត្តមានជាតារាកិត្តិយសនៅក្រៅប្រទេសមានដូចជាថៃ និងម៉ាឡេស៊ី ហើយអ្វីដែលធ្វើឱ្យអ្នកគាំទ្រទាំងថ្មីនិងចាស់ភ្ញាក់ផ្អើលនោះគឺទឹកដមសំឡេងអ្នកស្រីនៅតែដូចកាលពីមុន មិនប្រែប្រួលទាល់សោះ។
អ្នកគាំទ្របានសរសើរថាថ្វីត្បិតតែវ័យជ្រេ សក់សពេញក្បាលតែសម្រស់របស់អ្នកចម្រៀងរូបនេះនៅតែមើលទៅស្រស់ស្អាត និងក្មេងជាងវ័យជាពិសេសគឺទឹកដមសំឡេងដែលនៅតែមានថាមពលនិងពីរោះដូចកាលពីមុន៕
តោះស្ដាប់សាកប្រៀបធៀបបន្តិច តើទឹកដមសំឡេងរបស់ អ្នកស្រី Frances Yip តែដូចមុនឬយ៉ាងណា?
សំឡេងច្រៀងផ្ទាល់លើឆាកថ្មីៗនៅប្រទេសម៉ាឡេស៊ី (ចាប់ពីនាទី ៦.៤៣ តទៅ)
សំឡេងច្រៀងបញ្ចូលក្នុងភាពយន្ត Shanghai Bund