ក្រសួងវប្បធម៌ និងវិចិត្រសិល្បៈ រួមទាំងកុងស៊ុលកម្ពុជាប្រចាំនៅប្រទេសថៃ កំពុងស្រាវជ្រាវលម្អិតលើករណីការសាងសង់ប្រាសាទដូចទៅនឹងអង្គរវត្តនៅលើទឹកដីថៃ។
យោងតាមរយៈការប្រតិកម្មពីអ្នកលេងបណ្ដាញសង្គម និងមានការផ្សព្វផ្សាយចែករំលែកគ្នាយ៉ាងខ្លាំងលើអ៊ិនធឺណិត និង មានសារព័ត៌មានក្នុងស្រុកក៏បានធ្វើការចុះផ្សាយពីការសាងសង់អង្គរវត្តទីពីរដែលជាគម្រោងសាងសង់ប្រាសាទអង្គរវត្តចម្លងធំជាងគេនៅលើពិភពលោក នៅក្នុងទឹកដីខេត្ត បុរីរ៉ាំ ក្នុងវត្តភូម៉ានហ្វា ជាទីតាំងល្បីល្បាញរបស់ប្រទេសថៃលើរឿងការសាងសង់ប្រាសាទថ្ម បន្ទាប់ពីទទួលជោគជ័យក្នុងការកសាងប្រាសាទកំពូល ៣ រចនាបទខ្មែរ រួចមកហើយនោះ ពេលនេះគម្រោងបន្ទាប់របស់គេ គឺកសាងប្រាសាទអង្គរវត្តទី២ ឬ ប្រសិទ្ធនាមថ្មីថា «ប្រាសាទសីហនគរ»។
ខណៈនេះលោក ជំទាវ ភឿង សក្កណា រដ្ឋមន្ត្រីក្រសួងវប្បធម៌ និង វិចិត្រសិល្បៈ បានឱ្យ ក្រសួងបានទាក់ទងទៅកុងស៊ុល កម្ពុជាប្រចាំនៅប្រទេសថៃដើម្បីឱ្យស្រាវជ្រាវលើករណីនេះឱ្យបានល្អិតល្អន់។ ចំណែកឯប្រជាពលរដ្ឋខ្មែរ ក៏បានធ្វើចលនាប្រឆាំងតវ៉ា យ៉ាងដាច់ខាត លើបណ្ដាញសង្គម ចំពោះការសាងសង់ប្រាសាទថ្មចម្លងតាមប្រាសាទអង្គវត្តខ្មែរនេះយ៉ាងខ្លាំងក្លាផងដែរ។
ប្រាសាទអង្គរទីពីរ ឬ ប្រាសាទសីហនគរ បានប្រារព្ធពិធីបុកគ្រឹះលើកដំបូងកាលពីថ្ងៃទី៥ ខែមេសា ឆ្នាំ ២០២១ កន្លងមក ក្នុងបរិវេណញវត្តភូម៉ានហ្វា ផាយ៉ាឆារ៉ង ភូមិបានណងបូរ៉ាយ ឃុំបានសិង្គ ស្រុកនាងរ៉ង ខេត្តបុរីរ៉ាំ ព្រះរាជាណាចក្រថៃ៕