សិល្បៈអន្តរជាតិ៖ អ្នកគាំទ្រទន្ទឹងរង់ចាំយ៉ាងអន្ទះសារថា តើពេលណាទៅទើបអ្នកទាំងពីរ ជាពិសេស James ព្រមបង្ហាញមុខសង្សារឱ្យអ្នកគាំទ្របានឃើញច្បាស់ៗ។ ទីបំផុតការទន្ទឹងបានមកដល់ទីបញ្ចប់ព្រោះសាមីខ្លួន James Ji បានបង្ហោះរូបភាពផ្អែមល្ហែមរបស់ខ្លួននិងសង្សារនៅលើ Instagram ផ្ទាល់ខ្លួន។
សេពគប់មើលចិត្តមើលថ្លើមគ្នាជាច្រើនឆ្នាំហើយសម្រាប់បុរសសង្ហា James Jirayu និងសង្សារកញ្ញា Foam (โฟม) នារីនៅក្រៅរង្វង់សិល្បៈ យ៉ាងណាមិញគូស្នេហ៍មួយគូនេះមិនធ្លាប់មានរូបផ្អែមល្ហែមឬរូបគូជាមួយគ្នាឡើយ បើមានអាចមានដោយសារតែអ្នកទាំងពីរថតជុំគ្នាជាមួយមិត្តភក្ដិហើយត្រូវមិត្តភក្តិក្នុងក្រុមយកទៅផុសប៉ុណ្ណោះ។
ទីបំផុតនៅឱកាសដែល James Jirayu ធ្វើដំណើរកម្សាន្តទៅលេងសមុទ្រ ស្រាប់តែម្ចាស់ខ្លួនបានបង្ហោះរូបភាពជាច្រើនសន្លឹកនៅក្នុងបរិយាកាសស្រស់ស្រាយមុខឆ្នេរខ្សាច់ ព្រមជាមួយនឹងសំណេររៀបរាប់ថា «ងាកខ្នងឱ្យកាមេរ៉ា ងាកមុខដាក់សមុទ្រ ហើយងាកបេះដូងរកអូន»។ ក្រៅពីពាក្យពេចន៍ផ្អែមល្ហែមហើយ រូបភាពដែលលាក់ទុកចុងក្រោយគេនោះគឺជារូបថតឱបគ្នាស្អិត សម្លឹងកាមេរ៉ារវាង James និងគូស្នេហ៍ នារីក្រៅរង្វង់សិល្បៈ។
រូបភាពមួយសន្លឹកនេះមិនត្រឹមតែអ្នកគាំទ្រនោះដែលចាប់អារម្មណ៍ចូលមកបញ្ចេញចំណាប់អារម្មណ៍ព្រោះសូម្បីតែអ្នកសិល្បៈដូចគ្នាក៏បានចូលមកសម្ដែងក្ដីរីករាយនិងអបអរចំពោះគូស្នេហ៍មួយគូនេះផងដែរ៕
ប្រភព៖ Thairath