ក្រុមបាល់ទាត់ណាហ្គាវើល បានបញ្ជាក់នៅលើហ្វេសប៊ុកផ្លូវការខ្លួនថា ក្រុមមិនបានចូលហ្វឹកហាត់ផ្លូវការ (Official Training) នៅទីលាន 7NG ដែលជាទឹកដីប្រកួតផ្លូវការរបស់ក្រុមបាល់ទាត់អគ្គស្នងការដ្ឋាននគរបាលជាតិ (ប៉ូលិស) នោះទេ ខណៈស្អែកនេះការប្រកួតនឹងមកដល់ហើយ។
សំណេរនៅលើហ្វេសប៊ុកក្លិបរសៀលថ្ងៃអង្គារ នេះថា៖«ថ្ងៃនេះមិនមានការហ្វឹកហាត់ផ្លូវការនោះទេ លើទីលាន7NG ដែលជាទឹកដីរបស់ក្លិបបាល់ទាត់នគរបាលជាតិ ត្រៀមប្រកួតជាមួយក្រុមណាហ្គាវើលដ៍ នាថ្ងៃស្អែកនេះ ព្រោះភ្លៀងធ្លាក់ជោគជាំ ធ្វើឲ្យទឹកលិចពុំអាចហ្វឹកហាត់បាន។ សង្ឃឹមថានៅថ្ងៃស្អែក អាកាសធាតុនឹងល្អប្រសើរឡើងវិញ ដើម្បីបង្កភាពងាយស្រួលដល់ការប្រកួតរបស់ក្រុមទាំងពីរ»។
អគ្គស្នងការដ្ឋាននគរបាលជាតិ ត្រូវប្រកួតជាមួយក្រុមណាហ្គាវើល ប្រចាំសប្ដាហ៍ទី៣ នៃពានរង្វាន់លីគកំពូលកម្ពុជា Metfone Cambodian League 2021 វេលាម៉ោង៣:៣០នាទីរសៀល លើទីលានបាល់ទាត់7NG ដែលមានទីតាំងនៅ ឃុំវិហារសួគ៌ ស្រុកខ្សាច់កណ្តាល ខេត្តកណ្តាល៕