សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ តំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃកម្ពុជា បានអញ្ជើញសម្ពោធអគាររដ្ឋបាលសាលាខេត្តព្រៃវែង នាថ្ងៃទី៥ ខែឧសភានេះ និង«សន្តិបាលាគារ កម្ពោជិកបុត្តាខេមរាតរី»។
នាឱកាសនោះ សម្ដេចក្រឡាហោម ស ខេង បានអញ្ជើញកាត់ខ្សែបូរ និងបំពាក់ខ្សែជ័យលើក្បាលទូក ដោយមានការអញ្ជើញចូលរួមពីសំណាក់ឯកឧត្តម លោកជំទាវ ជាថ្នាក់ដឹកនាំរាជរដ្ឋាភិបាល ថ្នាក់ដឹកនាំរដ្ឋបាលថ្នាក់ក្រោមជាតិ រួមទាំងរដ្ឋបាលខេត្តព្រៃវែង។
រោងតម្កល់ទូក ង ដែលត្រូវបានប្រសិទ្ធនាមថា«សន្តិបាលាគារកម្ពោជិកបុត្តាខេមរាតរី» ត្រូវបានបកស្រាយថាពាក្យនេះបានមកពីពាក្យ សន្តិ+បាល+អគារ ដែលមានន័យពេញថា អគាររក្សាសន្តិភាព/កន្លែងរក្សាសន្តិភាព សម្រាប់តម្កល់ទូកង កម្ពោជិកបុត្តាខេមរាតរី។
ឯកឧត្តម ស សុខា អនុប្រធានសហភាពសហព័ន្ធយុវជនកម្ពុជា ទទួលបន្ទុកខេត្តព្រៃវែង បាត់ដំបង និងបន្ទាយមានជ័យ និងឯកឧត្តមបណ្ឌិត ងិន បាណាល់ ប្រធានក្រុមការងារអភិវឌ្ឍយុវជនខេត្តព្រៃវែង ដែលជាអ្នកដឹកនាំ និងប្រតិបត្តិការកសាងទូកងវែងជាងគេនេះក៏មានវត្តមានចូលរួមផងដែរ។
សូមរម្លឹកថាបន្ទាប់ពីផ្ញើប្រាណក្នុងរោងបណ្ដោះអាសន្នរយៈពេលជិត៥ឆ្នាំ ទីបំផុត ទូកងវែងជាងគេលើពីភពលោក កម្ពោជិកបុត្តាខេមរាតរី ត្រូវបានរំកិលចូលមហារោងដោយប្រើកមកលាំងសរុប២០០នាក់ និងដើមចេក១៦០០ដើម កាលពីខែកុម្ភៈ ឆ្នាំ២០២៣។
ទូកង កម្ពោជិកបុត្តាខេមរាតរី បានបំបែកឯកទគ្គកម្មទូកងវែងជាងគេលើពិភពលោក Guinness World Record កាលពីថ្ងៃកាលពីថ្ងៃទី ១២ ខែវិច្ឆិកា ឆ្នាំ២០១៨។ ទូកនេះមានបណ្ដោយប្រវែង៨៧,៣០ម៉ែត្រ ទទឹង១,៩៤ម៉ែត្រ និងដាក់ចំណុះទូកបានរហូតដល់ទៅ១៧៩នាក់។
ការប្រសិទ្ធនាមថាទូកងនេះថា កម្ពោជិកបុត្តាខេមរាតរី គឺមានអត្ថន័យថា ទូកងរបស់កូនខ្មែរ រស់នៅក្នុងដែនដីកម្ពុជា។ ទូកនេះត្រូវបានរចនាឡើង ដោយផ្នែកខាងក្បាលទូកធ្វើជាក្បាលនាគ និងកន្ទុយហង្ស ប្រកបដោយក្បូរក្បាច់រចនាល្អប្រណិត។
ការជាប់កំណត់ត្រាពិភពលោករបស់ទូកងនេះ គឺបំបែកទូកដែលវែងជាងគេលើពិភពលោករបស់ប្រទេសចិនដែលមានប្រវែងសរុប ៧៧.៨ម៉ែត្រ។ ទូកងវែងរបស់កម្ពុជានេះ ប្រើប្រាស់ឈើគគីរអស់ចំនួន៦ដើម និងប្រើពេលផលិតអស់រយៈពេល១៩២ថ្ងៃ៕