សិល្បៈអន្តរជាតិ៖ ខណៈនេះមិត្តភាពរវាង James Ma និង Pie Rinrada បានចេញផុតពីពាក្យថាមិត្តភក្ដិ ព្រោះ James Ma បានប្រគល់តំណែងមនុស្សពិសេសប្រចាំបេះដូងឱ្យទៅខាងស្រីជាស្ថាពរហើយ។
សម្រាប់គូរបស់ James Ma និង Pie Rinrada ត្រូវបានអ្នកគាំទ្រចាត់ទុកជាដៃគូសម្ដែង ដែលចង់ឱ្យប្ដូរឋានៈពីមិត្តភក្ដិធម្មតា មកជាគូស្នេហ៍ ចាប់តាំងពីអ្នកទាំងពីរមានឱកាសបានចាប់គូសម្ដែងជាតួឯកប្រុស-ស្រីក្នុងភាពយន្តភាគរឿង «Pror Rak» ជាមួយគ្នាពីដំបូងម្ល៉េះ។
អ្វីដែលធ្វើឱ្យមហាជនកាន់តែប្រាកដចិត្តថាអ្នកទាំងពីរអាចនឹងមានអារម្មណ៍ពិសេសៗឱ្យគ្នាទៅវិញទៅមកនោះគឺ ក្រោយបានចាប់ដៃគូសម្ដែងជាមួយគ្នា និងបានទៅដើរកម្សាន្តជាមួយគ្នានៅប្រទេសកូរ៉េជាមួយគូរបស់ Nadech និង Yaya អ្នកទាំងពីររមែងមាន រូបភាពគូ ជាហូរហែរបង្អួតភ្នែកមហាជន រហូតថ្មីៗនេះ ពេលផ្ដល់សម្ភាសន៍ដល់អ្នកសារព័ត៌មាន James Ma បានទទួលស្គាល់ថាខ្លួននិង Pie បច្ចុប្បន្នចេញផុតពីតំបន់ Friendzone លែងត្រឹមជាមិត្តភក្ដិធម្មតាដូចពីមុនទៀត។
នៅក្នុងផ្ដល់បទសម្ភាសន៍នោះ James Ma បានរៀបរាប់ឱ្យដឹងថាអ្នកទាំងពីរស្គាល់គ្នារយៈពេល៥ឆ្នាំហើយ បានស្គាល់និងសិក្សាពីចរិតឬកពាររបស់ខាងស្រីបានច្រើន លោកយល់ថាមកដល់ពេលនេះអ្នកទាំងពីរហួសពីពាក្យថាមិត្តភក្ដិហើយ ព្រោះអាចនិយាយគ្នាបានគ្រប់រឿង គាំទ្រគ្នាគ្រប់កាលៈទេសៈ ប៉ុន្តែទំនាក់ទំនងរវាងគ្នានៅពេលនេះគឺប្រសើរជាងមុនខ្លាំងណាស់។
James Ma បានសរសើរចំណុចល្អៗរបស់ Pie Rinrada ប្រាប់អ្នកសារព័ត៌មានថានាងគឺជាមនុស្សម្នាក់ ពូកែ ចូលចិត្តដាក់ខ្លួន មានទឹកចិត្តល្អ អាចមើលថែគ្រប់គ្នាបានយ៉ាងល្អ។
James Ma បាននិយាយថា «ពេលយើងមានឱកាសបានទៅដើរលេងជាមួយគ្នា បានស្គាល់គាត់កាន់តែខ្លាំងជាងមុន ខ្ញុំមានអារម្មណ៍ថាគាត់គួរឱ្យស្រលាញ់ យើងមកដល់ចំណុចនេះ ខ្ញុំមានអារម្មណ៍ថា គួរតែមានការប្ដូរឋានៈពីមិត្តធម្មតាមកជាមនុស្សពិសេសបានហើយ។
មែនទែនទៅ James Ma គឺជាតារាសម្ដែងមួយដួង ដែលចាប់ផ្ដើមមានឈ្មោះល្បីល្បាញក្រោយបានចូលរួមសម្ដែងក្នុងភាពយន្តភាគជាស៊េរីខ្នាតធំ រឿងសុភាពបុរសចុថាថេប ក្នុងវគ្គ រុណណៈភី ដោយកាលនោះចាប់ដៃគូសម្ដែងជាមួយនឹងតារាស្រី Mint Chalita៕
