សិល្បៈអន្តរជាតិ៖ កាលពីថ្ងៃទី១៤ ខែឧសភា ម្សិលមិញនេះ នៅប្រទេសមានរៀបចំការបោះឆ្នោតជាតិដ៏ធំ ហើយក្រោយពីបញ្ចប់ការបោះឆ្នោតនិងរាប់សន្លឹកឆ្នោតបឋម គេមើលឃើញថាបក្សទើបបង្កើតថ្មី ឆ្ពោះទៅមុខ (Moving Forward) មានសំឡេងគាំទ្រនៅក្នុងទីក្រុងបាងកកភ្លូកទឹកភ្លូកដី រហូតទទួលបានកៅអីចំនួន៣៣ ខណៈដែលក្នុងចំណោមនោះមានម្នាក់គឺជាតារាសម្ដែង-ពិធីករល្បីឈ្មោះ កញ្ញា หมิว สิริลภัส กองตระการ (Sirilapas Kongtrakarn)។
រយៈពេល២ឆ្នាំ នៃការបញ្ចេញមតិយ៉ាងផុសផុលប្រឆាំងនឹងរដ្ឋាភិបាលលោកប្រាយុទ្ធ ទីបំផុតអតីតតារាសម្ដែងនិងពិធីករល្បីឈ្មោះរូបនេះមុននឹងបោះជំហានចូលក្នុងបក្សឆ្ពោះទៅមុខ និងឈរឈ្មោះជាតំណាងរាស្ត្រក្នុងក្រុងបាងកក តំបន់ ១៤ ដោយគិតត្រឹមព្រឹកថ្ងៃទី ១៥ ឧសភា នេះសំឡេងឆ្នោតគាំទ្រនាង បាននាំមុខគូប្រកួតរហូតដល់ជាង១ម៉ឺនសំឡេងគាំទ្រ។
ថ្មីៗនេះក្រោយសំឡេងឆ្នោតបឋមនាំមុខគូប្រកួត សាមីខ្លួនកញ្ញា Mew បានបង្ហោះហ្វេសប៊ុកថ្លែងអំណរគុណចំពោះសំឡេងគាំទ្រ និងអរគុណចំពោះប្រជាពលរដ្ឋថៃដែលបានចេញមកប្រើប្រស់សិទ្ធិរបស់ខ្លួនយ៉ាងគគ្រឹកគគ្រេង ជាពិសេសនាងបានលើកឡើងថាសំឡេងឆ្នោតដែលទទួលបានគឺជាក្ដីសុបិន និងក្ដីសង្ឃឹមរបស់ប្រជាជនថៃទូទាំងប្រទេស។
«គ្រប់ពេលដែល Mew ចុះមូលដ្ឋាន រឿងដែលធ្វើឱ្យមានកម្លាំងចិត្តដើរទៅមុខ ក្រៅពីកម្លាំងចិត្តរបស់បងប្អូនប្រជាជន នោះគឺការជឿជាក់ថា ប្រទេសថៃ នឹងបានប្រសើរជាងនេះ អនាគតកូនក្មួយយើង នឹងល្អជាងនេះ ហើយនៅពេលបានចូលទៅធ្វើការងារ ខ្ញុំនឹងធ្វើការងារឱ្យសមនឹងប្រាក់បៀរវត្សប្រចាំខែដែលទទួលបាន ដូចរាល់ពេលដែលខ្ញុំបាននិយាយទុក មិនថាទោះជាអាជីពណាក៏ដោយ។
ចាប់ពីពេលនេះទៅផ្លូវដើរថ្មីបានចាប់ផ្ដើមហើយ សូមធ្វើជាកម្លាំងចិត្តសម្រាប់ខ្ញុំនិងបក្សឆ្ពោះទៅមុខទាំងអស់គ្នា តោះយើងមករួបរួមគ្នាធ្វើឱ្យប្រទេសថៃកាន់តែល្អប្រសើរជាមួយគ្នា។
សូមជម្រាបថាគិតត្រឹមព្រឹកថ្ងៃទី១៥ ខែឧសភា គណបក្សឆ្ពោះទៅមុខរបស់កញ្ញា Mew មានសំឡេងឆ្នោតគាំទ្របឋមនាំមុខគេលំដាប់លេខ១ តាមពីក្រោយដោយគណបក្សផឿថៃ (បក្សថាក់ស៊ីននិយម) ដោយលទ្ធផលនេះស្ថិតក្នុងភាពបណ្ដោះអាសន្ន អាស្រ័យការរាប់សំឡេងឆ្នោតបានជាង៩០ភាគរយ៕
ប្រភព៖ Sanook, Khaosod