ទីបំផុតកិច្ចប្រជុំគណៈអចិន្រៃ្ដយ៍សហព័ន្ធកីឡាអាស៊ីអាគ្នេយ៍ បានសម្រេចច្បាស់ហើយថាព្រឹត្តិការណ៍ប្រកួតកីឡាប្រចាំតំបន់អាស៊ីភាគអាគ្នេយ៍ ហៅថាស៊ីហ្គេម នៅចុងឆ្នាំ២០២១ នេះត្រូវលើកពេលប្រកួតដោយសារការឆ្លងរីករាលដាលខ្លាំងធ្វើឱ្យម្ចាស់ផ្ទះវៀតណាម មិនអាចរៀបចំការប្រកួតបាន។
បើតាមការជូនដំណឹងរបស់ឯកឧត្តម វ៉ាត់ ចំរើន អគ្គលេខាធិការ នៃគណៈកម្មាធិការជាតិអូឡាំពិកកម្ពុជា ក្រោយបញ្ចប់កិច្ចប្រជុំនៅរសៀលថ្ងៃព្រហស្បតិ៍ ទី៨ កក្កដា ២០២១ ថ្មីៗនេះថា«លទ្ធផលនៃកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ មាន២ចំណុចសំខាន់ៗ រួមមាន៖ ១-SEA Games នៅវៀតណាម មិនរៀបចំឆ្នាំ២០២១ នេះទេ ដោយការឯកភាពជាឯកច្ឆ័ន។ ២-SEA Games នៅវៀតណាម ឯកភាពគ្នាចំនួន១០ប្រទេស រួមទាំងម្ចាស់ផ្ទះវៀតណាម (ហ្វីលីពីន ចំថ្ងៃបោះឆ្នោតសកល នាខែឧសភា) លើកទៅចុងខែមេសា ដល់ដើមខែឧសភា ឆ្នាំ២០២២ ប៉ុន្តែវៀតណាម ត្រូវស្នើសុំអនុម័ត និងកំណត់ថ្ងៃឲ្យបានច្បាស់លាស់ពីរដ្ឋាភិបាលរបស់ខ្លួន ក្នុងពេលឆាប់ៗនេះ»។
តាមផែនការការប្រកួតកីឡាស៊ីហ្គេម ធ្វើឡើងនៅរាល់២ឆ្នាំម្តង ខណៈឆ្នាំ២០២១ នេះវេនធ្វើឡើង២ឆ្នាំបន្ទាប់ពីហ្វីលីពីន កាលពីឆ្នាំ២០១៩។ ដើមឡើយវៀតណាម គ្រោងរៀបចំការប្រកួតពីថ្ងៃទី២១ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២១ ប៉ុន្តែដោយសារការឆ្លងរីករាលដាលនៃជំងឺកូវីដ-១៩ ក្នុងប្រទេសខ្លាំង ប្រទេសនេះបាន ស្នើសុំទៅអាស៊ាន ដើម្បីសុំលើកពេលប្រកួត។
កន្លងមកម្ចាស់ផ្ទះស៊ីហ្គេមវៀតណាម បានកំណត់ប្រភេទកីឡាចំនួន៤០ប្រភេទមានវិញ្ញាសាសរុបចំនួន ៥២៦ ដាក់ឱ្យអត្តពលិកមកពីប្រទេសអាស៊ានចូលរួមប្រកួតប្រជែង៕