ក្រោយម្ចាស់ផ្ទះវៀតណាម ទទួលបានសម្រេចពន្យាពេលស៊ីហ្គេម លើកទី៣១ ពីចុងឆ្នាំ២០២១ ទៅ អំឡុងពាក់កណ្តាលឆ្នាំ២០២២ ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) បានអំពាវនាវឲ្យសហព័ន្ធកីឡាជាតិនានាធ្វើផែនការហ្វឹកហាត់ក្រុមជម្រើសជាតិរបស់ខ្លួនឲ្យបានសស្រាក់សស្រាំ ដោយចាត់ទុកថានេះជាឱកាសល្អ ដែលកម្ពុជា មានពេលវេលាបន្ថែមទៀត ក្នុងការត្រៀមខ្លួនចូលរួមប្រកួតមេដាយ។
ការលើកឡើងរបស់ថ្នាក់ដឹកនាំកីឡាករខាងលើបន្ទាប់ពីបញ្ចប់កិច្ចប្រជុំអនឡាញជាមួយគណៈអចិន្ត្រៃយ៍ក្រុមប្រឹក្សាកីឡាអាស៊ីអាគ្នេយ៍ (SEA Gamse) នៅរសៀលថ្ងៃទី៨ ខែកក្កដា ឆ្នាំ២០២១ថ្មីៗនេះ។ «យើងមានពេលវេលាច្រើនសម្រាប់ការចូលរួមស៊ីហ្គេម នៅប្រទេសវៀតណាម ក៏ពិតមែន ប៉ុន្តែយើងក៏បានបាត់បង់ពេលវេលាច្រើនដែរ ក្នុងការហ្វឹកហាត់ ដោយសារស្ថានភាពវិបត្តិជំងឺកូវីដ-១៩»។ ឯកឧត្តមបន្ថែម។
ថ្នាក់ដឹកនាំខាងលើលើកទឹកចិត្តឲ្យកីឡាករ កីឡាការិនីជម្រើសជាតិគ្រប់ប្រភេទកីឡាទាំងអស់បន្តកិច្ចខិតខំប្រឹងប្រែងហ្វឹកហាត់ឲ្យបានខ្លាំងក្លា ដើម្បីសម្រួចគោលដៅប្រជែងមេដាយ នៅក្នុងព្រឹត្តិការណ៍ កីឡាស៊ីហ្គេម លើកទី៣១ នៅប្រទេសវៀតណាម ដែលជាហ្គេមយុទ្ធសាស្រ្តចុងក្រោយរបស់កម្ពុជា ក្នុងការសម្រួចគោលដៅ ឆ្ពោះទៅទទួលរៀបចំធ្វើម្ចាស់ផ្ទះ ស៊ីហ្គេម លើកទី៣២ និងការប្រកួតកីឡាជនពិការ អាស៊ានប៉ារ៉ាហ្គេម លើកទី១២ ឆ្នាំ២០២៣។
អត្ថបទពាក់ព័ន្ធ៖កីឡាស៊ីហ្គេមឆ្នាំ២០២១ នៅវៀតណាម ត្រូវលើកទៅឆ្នាំ២០២០ តែមិនកំណត់ពេលច្បាស់
ឆ្លៀតក្នុងឱកាសកិច្ចប្រជុំខាងលើបានស្នើសុំដល់សមាជិកនៃកីឡាអាស៊ីអាគ្នេយ៍ ទាំងអស់ ចូលរួមផ្សព្វផ្សាយ ចូលរួមគាំទ្របន្ថែមទៀតដល់ ស៊ីហ្គេម នៅកម្ពុជា ដែលកម្ពុជានឹងត្រូវបើកយុទ្ធនាការជាតិផ្សព្វផ្សាយពេលឆាប់ឆាប់ខាងមុខនេះ។ ប្រទេសទាំងអស់បានឯកភាព ហើយបានកោតសរសើរ និងបានវាយតម្លៃខ្ពស់ថា កម្ពុជាពិតជាមានជំហរច្បាស់លាស់ និងពិតប្រាកដ នៅក្នុងការត្រៀមធ្វើម្ចាស់ផ្ទះ ឆ្នាំ២០២៣ ហើយប្រទេសទាំងអស់រង់ចាំជួយជ្រោមជ្រែងការផ្សព្វផ្សាយ ក្នុងការបើកយុទ្ធនាការផ្សព្វផ្សាយនេះទាំងអស់គ្នានៅគ្រប់ប្រទេសទាំងអស់។
ដោយឡែក ក្នុងប្រកួតកីឡាអូឡាំពិក នៅទីក្រុងតូក្យូ ប្រទេសជប៉ុន ចាប់ពីថ្ងៃទី២៣ ខែកក្កដា ឆ្នាំ២០២១តទៅនោះ គឺថាបណ្តាប្រទេសនានាក្នុងអាស៊ីអាគ្នេយ៍ នឹងយកវិធានការទប់ស្កាត់កូវីដ-១៩ ដែលត្រូវបានចែងនៅក្នុងអូឡាំពិកអន្តរជាតិ ភាគីអាស៊ីអាគ្នេយ៍ទាំងមូលនឹងខិតខំរួមគ្នាប្រមែប្រមូលយកវិធានការទាំងអស់នោះមកធ្វើជាវិធានការនៃការទប់ស្កាត់កូវីដ-១៩ យកមករៀបចំ ស៊ីហ្គេម នៅវៀតណាម ក៏ដូចជាស៊ីហ្គេម នៅកម្ពុជា ឆ្នាំ២០២៣ផងដែរ ប្រសិនបើជាស្ថានភាពនៅតែមាន។
សូមបញ្ជាក់ថាការប្រកួតកីឡាស៊ីហ្គេម លើកទី៣១ នៅប្រទេសវៀតណាម ដែលគ្រោងនឹងរៀបចំចុងឆ្នាំ២០២១ ត្រូវបានពន្យាពេលទៅរៀបចំនាចុងខែមេសា ដល់ដើមខែឧសភា ឆ្នាំ២០២២ ដោយគណៈអចិន្ត្រៃយ៍ស៊ីហ្គេម បានឯកភាពគ្នា ក្រោមការសម្របសម្រួល និងសម្រេចចិត្តយ៉ាងផុលផុស ជាពិសេសគឺបានការឯកភាពគ្នាទាំងស្រុងក្នុងការជួយគ្នាទៅវិញទៅមកជួយបន្ធូរបន្ថយស្ថានភាពតានតឹងនៃវិបត្តិជំងឺកូវីដ-១៩នេះ។ ម្ចាស់ផ្ទះ ស៊ីហ្គេម វៀតណាមនឹងកំណត់ការបរិច្ឆេតច្បាស់លាស់ ឆាប់ៗខាងមុខនេះ ក្នុងចន្លោះខែមេសា ដល់ខែឧសភា ក្នុងឆ្នាំ២០២២ ជូនក្រុមប្រឹក្សាកីឡាអាស៊ីអាគ្នេយ៍ ក្រោយដាក់សំណើរនេះជូនដល់រដ្ឋាភិបាលរបស់ខ្លួន៕
អត្ថបទ&រូបភាព៖Sea Games 2023
