សិល្បៈអន្តរជាតិ៖ កំពុងតែផ្ទុះការចាប់អារម្មណ៍ខ្លាំងនៅក្នុងសង្គមថៃនាពេលថ្មីៗនេះ ដោយសារតែកូនសម្លាញ់របស់លោក Nawat Itsaragrisil កញ្ញា Charlotte Austin ម្ចាស់តំណែង Miss Grand លំដាប់រងទី៥ ឆ្នាំ ២០២២ ត្រូវបានអ្នកលេងបណ្ដាញសង្គមគាស់កកាយផុសចាស់ៗកាលពីឆ្នាំ៩ឆ្នាំមុន ដែលកាលណោះកញ្ញាបានសរសេរសារប្រមាថចំពោះអតីតនាយករដ្ឋមន្ត្រីថៃលោក ថាក់ស៊ីន។
សារដែលបង្កឱ្យកើតមានបញ្ហាចម្រូងចម្រាសកើតឡើងនេះ កញ្ញាបានសរសេរថា៖ «មនុស្សដូចថាក់ស៊ីន គ្រាន់តែរបូតក្បាលនៅតិចពេកណាស់»។ យ៉ាងណាមិញក្រោយផុសចាស់របស់ខ្លួនត្រូវបានគេគាស់កកាយយកត្រលប់មកវិញកញ្ញា Charlotte បានបើកចិត្តចំពោះករណីនេះថា ខ្លួនត្រៀមរួចជាស្រេចសម្រាប់ការសុំទោសចំពោះកំហុសពីអតីតកាលដែលខ្លួនធ្លាប់បានខុសឆ្គង ដែលកំហុសឆ្គងនេះកើតឡើងព្រោះតែគំនិតក្មេងខ្ចីរបស់ខ្លួនតាំងពីអាយុ១៤ឆ្នាំ ហើយនៅពេលនោះខ្លួនក៏បានសុំទោសលោក ថាក់ស៊ីន ឈិនណាវ៉ាត់ ក្រុមគ្រួសារនិងប្រជាជនថៃផងដែរ។
Charlotte បានរៀបរាប់យ៉ាងដូច្នេះថា៖ «រឿងដែលចង់បកស្រាយនេះគឺជារឿងដែលកើតឡើងកាលពី៩ឆ្នាំមុន ជាដំបូងនាងខ្ញុំសុំទោសចំពោះការផុសដែលធ្វើឱ្យកើតមានរឿងមិនសប្បាយចិត្តនាខណៈនេះ ខ្ញុំគ្មានពាក្យអ្វីលើកយកមកបកស្រាយនិងលាងខ្លួន ឱ្យរួចផុតពីកំហុសកាលពីអតីតកាល ចំពោះរឿងដែលបានប្រព្រឹត្តិឆ្គាំឆ្គងដោយសារតែនៅក្មេងសេចក្ដីមានវ័យត្រឹមតែ១៤ឆ្នាំនាពេលនោះ រឿងរ៉ាវដែលកើតឡើងទាំងអស់នៅកាលណោះនាងខ្ញុំសូមទទួលកំហុសទាំងអស់ដោយមិនប្រកែកប្រឈាំងអ្វីទាំងអស់»
«ឈានមកដល់សព្វថ្ងៃនេះ ខ្ញុំធំហើយ ខ្ញុំគិតថាខ្លួនឯងចាប់ផ្ដើមយល់ដឹងច្រើនជាងមុន មើលឃើញនិងកាត់សេចក្ដីគ្រប់ហេតុការណ៍បានជារួមច្រើនជាងមុន ចំណែកពាក្យសម្ដីឬទង្វើណាមួយ ដែលនាំឱ្យកើតមានភាពក្ដៅក្រហាយចំពោះអារម្មណ៍អ្នកបានបង្ហោះឬបុគ្គលផ្សេងៗទៀត មិនថាហេតុការណ៍ណាក្ដី ខ្ញុំនៅក្នុងថ្ងៃនេះដែលបានធំធាត់ជាមនុស្សពេញវ័យ នឹងមិនធ្វើរឿងខុសឆ្គងច្រំដែលទៀត ហើយនាងខ្ញុំសុំអះអាងថា ខ្ញុំនឹងឈរនៅខាងភាពត្រឹមត្រូវ យុត្តិធម៌ និងប្រជាជន សុំទោសម្ដងទៀតសម្រាប់ហេតុការណ៍ដែលកើតឡើង សុំទោសអស់ពីចិត្ត»
ចុងក្រោយ Charlotte បានបញ្ជាក់ទៀតថា៖ «ខ្ញុំនឹងយករឿងនេះជាមេរៀន ហើយត្រូវគិតគូឱ្យម៉ត់ចត់ មុននឹងចង់និយាយ ឬប្រព្រឹត្តិទង្វើណាមួយ ព្រោះពាក្យសម្ដី និងទង្វើនោះអាចនឹងប៉ះពាល់ដល់យើងនាពេលអនាគត ហើយខ្ញុំក៏នឹងប្រយ័ត្នប្រយែង សុំទោសម្ដងទៀត។ សម្ដីគ្រប់ម៉ាត់កាលណោះ Charlotte ចាំបាច់ត្រូវសុំទោស លោកថាក់ស៊ីន ក្រុមគ្រួសារ និងបងប្អូនប្រជាជនទាំងអស់ ចំពោះសារដែលខ្ញុំបានបង្ហោះចេញទៅមានលក្ខណៈប្រមាថ គំរាមកំហែងកាលពីអតីតកាល»៕
ប្រភព៖ mgronline.
