សិល្បៈជាតិ៖ ធ្វើដំណើរមកដល់ទីបញ្ចប់ដោយមោទនភាពហើយសម្រាប់ព្រឹត្តិការណ៍កីឡាស៊ីហ្គេមលើកទី ៣២ ដែលកម្ពុជាធ្វើជាម្ចាស់ផ្ទះជាលើកដំបូងក្នុងរយៈពេល៦៤ឆ្នាំ។ យ៉ាងណាមិញមហាព្រឹត្តិការណ៍ដ៏អស្ចារ្យនិងផ្ទាំងទស្សនីយភាពជួយផ្សព្វផ្សាយពីសិល្បៈវប្បធម៌ខ្មែរនាពិធីបើកកីឡាស៊ីហ្គេម នៅតែទទួលបានកោតសរសើរពីមិត្តបរទេសរហូតមានការធ្វើ Reaction លើវីដេអូនោះថែមទៀតផង។
នៅក្នុងព្រឹត្តិការណ៍បើកកីឡាស៊ីហ្គេម មានរៀបចំផ្ទាំងទស្សនីយភាពចំរុះលាយបញ្ចូលគ្នា ដែលឆ្លុះបញ្ចាំងតាំងពីការកកើតដែនដីសុវណ្ណភូមិតាំងពីដំបូងរហូតមកទល់នឹងបច្ចុប្បន្ន ព្រមទាំងបង្ហាញពីសិល្បៈវប្បធម៌ ក្បាច់គុន អរិយធម៌ដ៏ផូរផង់របស់ប្រជាជាតិខ្មែរ និង ពិធីរត់ដង្ហែព្រះអគ្គីជ័យពីកីឡាករម្ចាស់មេដាយមាសគ្រប់ប្រភេទកីឡា នាំទៅថ្វាយស្ដេចនាគ ដើម្បីដុតភ្លើងគប់បំភ្លឺ បើកមហាព្រឹត្តិការណ៍នៅតែដក់ជាប់ក្នុងការចងចាំរបស់កូនខ្មែរ និង អ្នកដែលបានទស្សនា។
ថ្វីត្បិតព្រឹត្តិការណ៍ប្រកួតស៊ីហ្គេមបានបញ្ចប់ជាស្ថាពរ នឹងរៀបចំពិធីបិទ នៅថ្ងៃទី១៧ ខែឧសភា នេះក្ដី ប៉ុន្តែវីដេអូនៃព្រឹត្តិការណ៍បើក ត្រូវបានជនបរទេសមួយក្រុមស្ថិតនៅក្នុង University of The Nation Poipet បានធ្វើការ Reaction រហូតផ្ទុះការចាប់អារម្មណ៍និងសរសើរជាថ្មី។
ការដែលមិត្តបរទេសធ្វើការ Reaction លើវីដេអូពិធីបើក ហើយផ្ដល់ជាមតិល្អៗ នឹងក្លាយជាអំណះអំណាងល្អមួយសម្រាប់ប្រទេសកម្ពុជា ក្នុងការផ្សព្វផ្សាយដល់ភ្ញៀវទេសចរណ៍ឱ្យចង់ធ្វើដំណើរមកកម្សាន្តនៅប្រទេសកម្ពុជា។
ក្នុងនាមជាពលរដ្ឋកម្ពុជា យើងគ្រប់គ្នាគួរតែមានមោទកភាពជាតិ ព្រោះកម្ពុជាទើបតែមានឱកាសបានធ្វើជាម្ចាស់ផ្ទះជាលើកដំបូង ប៉ុន្តែកម្ពុជាបានបំពេញតួនាទីជាម្ចាស់ផ្ទះបានយ៉ាងល្អ ត្រឹមត្រូវ រហូតទទួលបានការសរសើរពីប្រតិភូកីឡា កីឡាករ-កីឡាការិនី និងអ្នកគាំទ្រទាំងអស់ដែលបានធ្វើដំណើរមកដល់ទឹកដីកម្ពុជាដើម្បីចូលរួមប្រកួតប្រជែងផងដែរ។
សូមទស្សនាវីដេអូ Reaction របស់បងប្អូនបរទេសពីព្រឹត្តិការណ៍បើកកីឡាស៊ីហ្គេមខាងក្រោមនេះ