សិល្បៈជាតិ៖ កំពូលតារាសម្ដែងលំដាប់ជួរមុខនៃព្រះរាជាណាចក្រកម្ពុជាបានកំពុងតែធ្វើឱ្យប្រជាជាតិកម្ពុជាមានមោទនភាពយ៉ាងក្រៃលែង ព្រោះកញ្ញា ស៊ីន យូប៊ីន បានបង្ហាញវត្តមានដើរលើកម្រាលព្រំក្រហមក្នុងមហោស្រពភាពយន្តលើកទី៧៦ ទីក្រុងកាន ប្រទេសបារាំង រហូតទទួលបានការចាប់អារម្មណ៍ពីបណ្ដាញសារព័ត៌មានអន្តរជាតិឱ្យចុះផ្សាយយ៉ាងគគ្រឹកគគ្រេង។
តួឯកស្រីរូបស្រស់របស់ស្ថានីយទូរទស្សន៍ភីអិនអិនរូបនេះ បានតស៊ូក្រាញននៀលក្នុងរង្វង់សិល្បៈជាច្រើនឆ្នាំដោយសារតែពាក្យថាស្រលាញ់ ទីបំផុតការប្រឹងប្រែងជំនះរាល់ឧបសគ្គរបស់តារាស្រីរូបនេះ បានហុចផលជាផ្លែផ្កាជាបន្តបន្ទាប់។ ស៊ីន យូប៊ីន និងដៃគូ គឺលោក ខាត់ វ៉ៃហាំង ទទួលបានពានរង្វាន់ជាច្រើនពីប្រទេសថៃនិងប្រទេសកូរ៉េ ដែលសបញ្ជាក់ពីភាពជោគជ័យក្នុងអាជីពរបស់នាងនិងដៃគូ។
ថ្វីត្បិតតែជើងរបួសរហូតប្រើប្រាស់ឈើច្រត់ជំនួយ ប៉ុន្តែទឹកចិត្តជាអ្នកសម្ដែងរបស់ ស៊ីន យូប៊ីន បានជំរុញឱ្យតារាស្រីរូបនេះ ទៅចូលរួម និងដើរលើកំរាលព្រំក្រហម ក្នុងមហោស្រពភាពយន្តលើកទី៧៦ នៅទីក្រុងកាន ប្រទេសបារាំងបានយ៉ាងរលូននិងប្រកបដោយក្ដីមោទកៈ។
គេនៅចាំបានថាកញ្ញាមានមហិច្ឆា ចង់ឱ្យអន្តរជាតិស្គាល់សិល្បៈខ្មែរ និងតារាខ្មែរកាន់តែច្រើន ហើយការចូលរួមក្នុងកម្មវិធីធំៗ និងមានមុខក្នុងក្របទស្សនាវដ្ដីម៉ូដលំដាប់ពិភពលោក គឺជាសក្ខីកម្មយ៉ាងច្បាស់បញ្ជាក់ពីសមត្ថភាពនិងកេរ្តិ៍ឈ្មោះរបស់តារាស្រីកម្ពុជារូបនេះ។
មែនទែនទៅ កញ្ញា ស៊ីន យូប៊ីន ថ្វីត្បិតជាតារាសម្ដែងស្រីដំបូងដែលបានទៅដើរលើកម្រាលព្រំក្រហមក្នុងមហោស្រពភាពយន្ត ប៉ុន្តែកញ្ញាគឺជាស្ត្រីខ្មែរទីពីរ បន្ទាប់ពីលោកជំទាវ យឹម ឆៃលីន ឧត្តមភរិយាឯកឧត្តម ហ៊ុន ម៉ានី ដែលជាស្ត្រីខ្មែរដំបូងនិងទីមួយ មានកិត្តិយសបានទៅដើរលើកម្រាលព្រំក្រហមក្នុងកម្មវិធីមហោស្រពភាពយន្តទីក្រុងកាន។