ក្រុមបាល់ទាត់ជម្រើសជាតិកូឡុំប៊ី ដណ្តើមបានកៅអីចំណាត់ថ្នាក់លេខ៣ក្នុងពានរង្វាន់ជើងឯកទ្វីបអាមេរិកខាងត្បូង Copa América 2021 ក្រោយយកឈ្នះលើក្រុមប៉េរូ ដោយលទ្ធផល៣ទល់២ នៅព្រឹកថ្ងៃសៅរ៍ ទី១០ ខែកក្កដា ឆ្នាំ២០២១ នេះ។
ក្នុងប្រកួតនេះ នៅនាទីទី ៤៥ កីឡាករ Yotún របស់ប៉េរូ រកគ្រាប់បាល់នាំមុខបានហើយ ហើយនៅ៤នាទីបន្ទាប់កីឡាករ Cuadrado បានរកគ្រាប់បាល់ឱ្យកូឡុំប៊ី តាមស្មើវិញ។ ចូលដល់នាទី៦៦ កីឡាករ Diaz បន្ថែមគ្រាប់បាល់ទី២ឱ្យកូឡុំប៊ី តែកីឡាករ Lapadula របស់ប៉េរូ រកគ្រាប់បាល់តាមស្មើវិញនៅនាទី៨២។ រហូតដល់ម៉ោងបន្ថែម ៩០+៤ កីឡាករ Diaz បន្ថែមគ្រាប់បាល់ទី៣ឱ្យក្រុមជម្រើសជាតិខ្លួនឈ្នះដាច់តែម្តង។
គ្រាប់បាល់បន្ថែមរបស់កីឡាករ Luis Díaz ធ្វើឱ្យរូបគេតាមស្មើកីឡាករ Leonel Messi របស់អាហ្សង់ទីន ដែលរកបានគ្រាប់បាល់ច្រើនជាងគេបណ្ដោះអាសន្នដែលមាន៤គ្រាប់ដូចគ្នា ក្នុងឆ្នាំ២០២១នេះ។
ចំណែកប្រកួតវគ្គផ្ដាច់ព្រ័ត្រក្នុងពានរង្វាន់នេះគឺជាការជួបគ្នារវាងក្រុមអាហ្សង់ទីន ជាមួយម្ចាស់ផ្ទះប្រេស៊ីល នៅវេលាម៉ោង៧ព្រឹក ថ្ងៃអាទិត្យ ទី១១ ខែកក្កដា ឆ្នាំ២០២១៕
