សិល្បៈជាតិ៖ ដូចប្រិយមិត្តអ្នកអានបានដឹងហើយថាបច្ចុប្បន្នតួសម្ដែងសំខាន់ៗនៅក្នុងភាពយន្តខ្នាតធំ «Rent Boy» កំពុងតែមមាញឹកថតយ៉ាងសស្រាក់សស្រាំ ហើយមានរូបភាពក្រៅឆាកជាច្រើនត្រូវបានក្រុមការងារនិងតួសម្ដែងបញ្ចេញលើបណ្ដាញសង្គមចែករំលែកជាមួយនឹងអ្នកគាំទ្រ។
ខាត់ វ៉ៃហាំង បានបង្ហោះរូបថតជាច្រើនសន្លឹកនៅលើបណ្ដាញសង្គម ដើម្បីចែករំលែកឱ្យអ្នកគាំទ្ររបស់លោកបានដឹងថាលោកកំពុងតែថតភាពយន្តថ្មី ដោយក្នុងនោះគេឃើញមានវត្តមានបុគ្គលសំខាន់ៗជាច្រើននាក់ដូចជា លោក លៀក លីដា ម្ចាស់ផលិតកម្ម LD Entertainment កញ្ញា ពេជ្រ វត្តីសារ៉ាវឌ្ឍី និងលោក Paing Takhon។
រូបភាពជាច្រើនសន្លឹកដែលបង្ហាញពីបរិយាកាសនៅកន្លែងថត រឹតតែធ្វើឱ្យអ្នកគាំទ្រអន្ទះសារចង់ឆាប់បានទស្សនា ប៉ុន្តែអ្វីដែលកាន់តែទាក់ទាញការចាប់អារម្មណ៍បន្ថែមទៀតនោះ គឺរូបថតរួមគ្នារវាង ខាត់ វ៉ៃហាំង និងបុរសមកពីទឹកដីមីយ៉ាន់ម៉ា ព្រោះថ្វីត្បិតតែអ្នកទាំងពីរ មានសាសន៍ខុសគ្នា និយាយភាសាផ្សេងគ្នា ប៉ុន្តែមុខមាត់របស់អ្នកទាំងពីរនៅពេលផ្ទឹមគ្នាទៅបែរជាស្រដៀងគ្នាខ្លាំងរហូតមានអ្នកភ្លាត់មាត់ថា «មើលតែកូនភ្លោះ។ល។»
ងាកមកចាប់អារម្មណ៍ការលើកឡើងរបស់តារាសម្ដែងកម្ពុជាយើង ខាត់ វ៉ៃហាំង បានបង្ហាញទឹកចិត្តរបស់ខ្លួនចំពោះមិត្តរួមអាជីពមកពីស្រុកក្រៅលើបណ្ដាញសង្គមហ្វេសប៊ុកថា៖ «
Welcome to Cambodia brother we try the best together for our movie ! រឿង Rent boy ជា project ប្រភេទ AEC movie ថ្មីមួយទៀតហើយសំរាប់ខ្ញុំ ល្មមដល់ពេលជួបគ្នាហើយ Paing Takhon team ‘’Rent Boy’’ movie ផលិតដោយ LD Entertainment Co.,LTD. អគុណ ផលិតករឆ្នើមលោក លៀក លីដា ដែលផ្ដល់មេរៀនថ្មី និង ទុកចិត្តលើសមត្តភាពខ្ញុំ »
គ្រាន់តែ LD Entertainment បញ្ចេញប្រូចេកភាពយន្តថ្មីនេះភ្លាម អ្នកវិភាគមួយចំនួន បានសម្លឹងឃើញផលវិជ្ជមានជាច្រើនដែលនឹងកើតមាននៅក្នុងវិស័យភាពយន្តជាតិ ព្រោះបុរសមកពីមីយ៉ាន់ម៉ារូបនេះមានអ្នកគាំទ្រច្រើនដែលប្រការនេះ នឹងជួយផ្សព្វផ្សាយពីវិស័យភាពយន្តខ្នាតធំខ្មែរ ឱ្យកាន់តែមានការចាប់អារម្មណ៍ ជាពិសេសរឿងនេះប្រសិនបើផលិតចេញទៅធ្វើត្រូវចំណូលចិត្តអ្នកគាំទ្រជាតិ និងអន្តរជាតិ ក៏នឹងក្លាយជាការបើកច្រកទ្វារថ្មីមួយទៀតសម្រាប់ផលិតករនិងផលិតកម្មភាពយន្តជាតិផងដែរ៕
