យោងតាមការចុះផ្សាយរបស់ China PR National Football Team 中國國足 បានឲ្យដឹងថាក្រុមជម្រើសជាតិចិន ក្រោមការដឹកនាំរបស់លោក Aleksandar Janković បានណាត់ មីយ៉ាន់ម៉ា និងប៉ាឡេស្ទីន ប្រកួតមិត្តភាពអន្តរជាតិនៅថ្ងៃ FIFA Day ខែមិថុនា ខាងមុខ។
កម្មវិធីប្រកួតរបស់ក្រុមជម្រើសជាតិចិន៖
-ចិន vs មីយ៉ាន់ម៉ា ថ្ងៃសុក្រ ទី១៦ ខែមិថុនា ឆ្នាំ២០២៣
-ចិន vs ប៉ាឡេស្ទីន ថ្ងៃអង្គារ ទី២០ ខែមិថុនា ឆ្នាំ២០២៣
ទីកន្លែង៖ កីឡដ្ឋាន Dalian Suoyuwan។
មូលហេតុក្រុមជម្រើសជាតិចិន ណាត់ មីយ៉ាន់ម៉ា និងប៉ាឡេស្ទីន ប្រកួតមិត្តភាពអន្តរជាតិនៅថ្ងៃ FIFA Day គឺដើម្បីត្រៀមខ្លួនក្នុងព្រឹត្តិការណ៍ AFC Asian Cup 2023 នៅប្រទេសកាតា។
ដោយប្រទេសចិន ស្ថិតនៅពូល A ជាមួយ ម្ចាស់ផ្ទះកាតា, តាជីគីស្ថាន និង លីបង់ ដែលគ្រោងនឹងចាប់ផ្តើមនៅថ្ងៃទី១២ ខែមករា រហូតដល់ ថ្ងៃទី១០ ខែកុម្ភៈ ឆ្នាំ២០២៤។
ខណ:ក្រុមជម្រើសជាតិបង់ក្លាដែស បានណាត់ក្រុមជម្រើសជាតិកម្ពុជា ប្រកួតមិត្តភាពអន្តរជាតិ នៅថ្ងៃទី១៥ ខែមិថុនា ឆ្នាំ២០២៣ (FIFA Day) ដើម្បីកម្តៅសាច់ដុំត្រៀមចូលរួមប្រកួតក្នុងពានរង្វាន់ប្រចាំតំបន់អាស៊ីខាងត្បូង SAFF Champion 2023 ធ្វើឡើងនៅប្រទេសឥណ្ឌា។
ដោយឡែកក្រុមជម្រើសជាតិកម្ពុជាវិញ នេះគឺជាជំនួបដំបូងហើយរបស់លោក Félix Dalmás ដែលដឹកនាំក្រុមកម្ពុជាប្រកួត បន្ទាប់ពីសហព័ន្ធបាល់ទាត់កម្ពុជា បានប្រកាសតែងតាំង ជាគ្រូបង្គោលថ្មីកាលពីថ្ងៃទី០២ មេសា ឆ្នាំ២០២៣ ជំនួសលោក Honda ក្រោយបញ្ចប់ភារកិច្ចប្រកួតស៊ីហ្គេម លើកទី៣២៕
