កន្លះម៉ោងប៉ុណ្ណោះក្រោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសនៅលើហ្វេសប៊ុក លទ្ធផលប្រកួតផ្តាច់ព្រ័ត្រកម្មវិធីប្រដាល់ អ្នកតស៊ូគុនខ្មែរគោជល់ កំពូលជើងឯក ត្រូវបានប្រកាសជាសាធារណៈថាកីឡាករ ឃឹម បូរ៉ា ជាម្ចាស់ជើងឯក។
នៅម៉ោង៨:៣០នាទីយប់ថ្ងៃអាទិត្យ ទី១១ ខែកក្កដា ឆ្នាំ២០២១ ថ្មីៗនេះ សម្តេចតេជោ មិនបានបញ្ជាក់ឱ្យចំពីការប្រកួតណាមួយនោះទេ ប៉ុន្តែគឺចំសាច់រឿងក្នុងការប្រកួតដណ្តើមខ្សែក្រវាត់កាលពីចុងសប្ដាហ៍កន្លងទៅរបស់ទូរទស្សន៍ CNC។ សម្តេចសរសេរថា៖«ដោយអត់ទ្រាំមិនបានខ្ញុំសូម ចេញមកនិយាយក្នុងនាមជាពលរដ្ឋខ្មែរម្នាក់ដែលស្រឡាញ់វិស័យកីឡា។ តើយើងត្រូវពង្រឹងអាជ្ញាកណ្តាលកីឡាប្រដាល់ឬត្រូវបង្កើតក្បាច់គុណថ្មីដោយកំណត់លក្ខខណ្ឌប្រកួតថ្មីដោយវាយខុសក្បួនហើយមិនព្រមប្រកាសលទ្ធផលនិងលើកពេលទៅប្រកួតនៅពេលក្រោយ»។
«តើឱ្យកីឡាប្រដាល់យើងឈានទៅមុខម្តេចបាន បើសហព័ន្ធកីឡាប្រដាល់ យើងទុកឱកាសឱ្យអាជ្ញាកណ្ដាលធ្វើបែបនេះ? តើមានក្បួនមកពីណាវាយខុសក្បួនខ្នាតហើយសម្រេចលើកពេលទៅប្រកួតពេលក្រោយ សូម្បីតែបាល់ទាត់ បើទាត់ខុសត្រូវពិន័យកាតលឿងឬកាតក្រហមដោយ ដេញចេញឬពិន័យបាល់១១ម៉ែត្រភ្លាមៗដោយ មិនទុកពេលឱ្យតវ៉ានោះទេ។ខ្ញុំមិនបន្ទោសកីឡាករទេព្រោះពួកគាត់ស្តាប់ តាមការកាត់ក្តីរបស់អាជ្ញាកណ្ដាល។ អ្វីដែលខ្ញុំសុំគឺអាជ្ញាកណ្ដាលត្រូវតែមានយុត្តិធម៌ក្នុងខ្លួន»។ សម្តេចតេជោ បន្ថែម។
ប្រហែលកន្លះម៉ោងក្រោយមក នៅម៉ោង៩:០៨នាទីយប់ថ្ងៃអាទិត្យ ទី១១ ខែកក្កដា ឆ្នាំ២០២១ ទូរទស្សន៍ CNC ដែលម្ចាស់សង្វៀនបានប្រកាសនៅលើហ្វេសប៊ុករបស់ខ្លួនថា៖«សហព័ន្ធកីឡាប្រដាល់គុនខ្មែរ រួមជាមួយស្ថានីយទូរទស្សន៍ CNC សម្រេចមិនលើកពេលប្រកួតផ្តាច់ព្រ័ត្រកម្មវិធីប្រដាល់ អ្នកតស៊ូគុនខ្មែរគោជល់ កំពូលជើងឯក ទេ ដោយប្រគល់ជ័យលាភីឲ្យទៅ ឃីម បូរ៉ា»៕