កីឡាករវាយកូនបាល់លេខ១ពិភពលោក Novak Djokovic ជនជាតិសែប៊ី បានក្លាយជាម្ចាស់ជើងឯក Wimbledon នៅប្រទេសអង់គ្លេស វិញ្ញាសាវាយឯកត្តជនបុរស ប្រចាំឆ្នាំ២០២១ នេះបន្ទាប់ពីរូបគេបានយកឈ្នះជើងឯកក្នុងព្រឹត្តិការណ៍Australian Open និងFrench Open កាលពីពេលថ្មីៗនេះ។
កីឡាករ Novak Djokovic បានយកឈ្នះកីឡាករ Matteo Berrettini របស់អ៊ីតាលី ដែលឈរលេខ៧ពិភពលោក ដោយលទ្ធផលនៅវគ្គផ្ដាច់ព្រ័ត្រ ៦-៧,៦-៤,៦-៤,៦-៣។ ដូច្នេះនេះជាលើកទី៦ហើយដែលកីឡាកររូបនេះឈ្នះជើងឯកនៅ Wimbledon ក្រោយឈ្នះលើដំបូងឆ្នាំ២០១១,២០១៤,២០១៥,២០១៨ និង២០១៩។
បេសកកម្មបន្ទាប់របស់កីឡាករ Novak Djokovic នឹងចូលរួមប្រកួតនៅកីឡាអូឡាំពិក ក្នុងទីក្រុងតូក្យូ ប្រទេសជប៉ុន និងពានរង្វាន់ US Open នៅសហរដ្ឋអាមេរិក។
ព្រឹត្តិការណ៍វាយកូនបាល់ Wimbledon ជា Grand Slams ១ក្នុងចំណោម៤ លើលោក ដែលធំជាងគេ ក្នុងនោះមាន Australian Open (នៅអូស្ត្រាលី) French Open (បារាំង) និង US Open (នៅអាមេរិក)។ ការប្រកួតនៅឆ្នាំនេះរៀបចំពីថ្ងៃទី២៨ខែមិថុនា ដល់១១ ខែកក្កដា ឆ្នាំ២០២១ លើទីលានAll England Lawn Tennis and Croquet Clubក្នុងទីក្រុងឡុងដុង ដោយមាន១៥វិញ្ញាសា៕
