នៅក្នុងវីដេអូឡាយដែលមានរយៈពេល១ម៉ោងនិង៦នាទីនេះ អត្ថន័យសំខាន់គឺអ្នកនាងចង់ចេញមកជូនដំណឹងដល់មហាជន ថាអ្នកនាងបានសម្រេចចិត្តច្បាស់ហើយ គឺអ្នកនាងនឹងដើរចេញពីពិភពសិល្បៈ ដូច្នេះទៅថ្ងៃមុខចង់ឱ្យមហាជនចាត់ទុកអ្នកនាងគ្រាន់តែជាមនុស្សធម្មតាម្នាក់ប៉ុណ្ណោះ។
មិនអាចទប់ទឹកភ្នែកជាប់ នៅក្នុងពេល Live នោះ នៅនាទី៣៥ ឡើង អ្នកនាងខ្ញុងដែលបច្ចុប្បន្នមានវ័យ៣៧ បានរៀបរាប់ទាំងទឹកភ្នែកដែរថា ៖ «មនុស្សយើងម្នាក់ៗតែងតែមានសេចក្ដីសុខ និង សេចក្ដីទុក្ខរៀងៗខ្លួន បងប្អូនមើលមកខ្ញុំជាអ្នកកំប្លែងជាអ្នកលក់ដូរ ខ្ញុំតែងបញ្ចេញនូវសកម្មភាពសើចសប្បាយ ឱ្យអ្នកទស្សនាបានរីករាយ ប៉ុន្តែនៅពីក្រោយស្នាមញញឹមនោះ អ្នកខ្លះក៏សប្បាយរីករាយ តែអ្នកខ្លះទៀតក៏លាក់ទុកនូវសេចក្ដីទុក្ខសោក មនុស្សយើងមិនដូចគ្នានោះទេ។ ដូច្នេះបងប្អូនមិនអាចវាយតម្លៃតែសំបកក្រៅបាននោះទេ»។
យ៉ាងណាមិញ អ្នកនាង ខ្ញុង បានឱ្យដឹងថារឿងខ្លះសូម្បីតែស្វាមីអ្នកនាងក៏មិនបានដឹងដែរ តែអាចនឹងដឹងតាមរយៈការ Live មួយនេះ អ្នកនាងនៅមិនទាន់បង្ហើបឱ្យដឹងពីមូលហេតុដែលបណ្ដាលឱ្យអ្នកនាងលាឈប់ពីសិល្បៈនោះទេ លុះត្រាអ្នកនាងដាក់ពាក្យលាឈប់ពីសិល្បៈរួចរាល់ ទើបអ្នកនាងនឹងចេញមកបកស្រាយឱ្យអស់ពីមូលហេតុដែលបណ្ដាលឱ្យអ្នកសម្រេចចិត្តលើកដៃលាអាជីពដែលអ្នកនាងស្រលាញ់មួយនេះ។
មហាជនដែលបានមើលការទស្សនាផ្ទាល់ និងបងប្អូនអ្នកគាំទ្រដែលមិនបានមើលការ Live ផ្ទាល់ក្ដីបានចូលមកបង្ហាញនូវអារម្មណ៍សោកស្ដាយជាពន់ពេក នៅពេលបានដឹងពីការសម្រេចចិត្តចាកចោលសិល្បៈរបស់តារាកំប្លែងដ៏មានសមត្ថភាពនិងទេពកោសល្យមួយនេះ ដោយមានអ្នកខ្លះលើកឡើងថា បាត់វត្តមានអ្នកនាង ច្បាស់ជាលែងល្អមើលដូចមុនហើយ ដោយអ្នកខ្លះឃាត់មិនឱ្យអ្នកនាង ដោយឡែកក៏មានអ្នកគាំទ្រមួយចំនួន បានគាំទ្រចំពោះការសម្រេចចិត្តរបស់អ្នកនាង ហើយជូនពរឱ្យអ្នកទទួលបានជោគជ័យក្នុងផ្លូវជីវិតថ្មីដែលអ្នកនាងបានជ្រើសរើស។
អ្នកគាំទ្រកំពុងតែទន្ទឹងរង់ចាំតាមដានជាបន្តទៀត ព្រោះនៅមិនទាន់ដឹងថាមូលហេតុណាមួយ ឬបញ្ហាអ្វីមួយដែលធ្វើឱ្យតារាកំប្លែងរូបនេះដាច់ចិត្តចោលសិល្បៈទាំងបានខំតស៊ូក្នុងវិថីរយៈពេលជិត៧ឆ្នាំកន្លងមកនេះ៕