ពានរង្វាន់វាយសីប្រចាំតំបន់អាស៊ាន Malaysia Master ឆ្នាំ២០២៣ របស់ម៉ាឡេស៊ី បញ្ចប់ថ្មីៗនេះ ស្រាប់តែដល់វេនពានរង្វាន់ Thailand Open របស់ថៃ ដំណើរការវិញម្តង ដោយប្រាក់រង្វាន់សរុបកើនឡើងជិតកន្លះលានដុល្លារ។
មិនខុសពី Malaysia Master ទេ ពានរង្វាន់ Thailand Open ក៏បើកឱ្យប្រកួតចំនួន៥វិញ្ញាសាដែរ ដោយក្នុងនោះមានវិញ្ញាសា៖
-ឯកត្តជនបុរស៖ កីឡាករ៦៣នាក់
-ឯកត្តជននារី៖ កីឡាការិនី ៥៩នាក់
-វាយគូបុរស៖ កីឡាករ៥១ក្រុម
-វាយគូនារី៖ កីឡាការនី ៤៤ក្រុម
-វាយគូចម្រុះ (បុរស-នារី) ៖ ៦០ក្រុម
អត្ថបទពាក់ព័ន្ធ៖ម្ចាស់ផ្ទះម៉ាឡេស៊ី បន្តរបូតពានវាយសី Malaysia Masters គិតពីឆ្នាំ២០១៧មក
សម្រាប់ប្រាក់រង្វាន់សរុបកើនដល់៤២០,០០០ ដុល្លារអាមេរិក ស្របពេលដែលអ្នកឡើងដល់វគ្គ៖
-១៦ក្រុមចុងក្រោយ៖ វិញ្ញាសាឯកត្តជន ១,៤៧០$, វិញ្ញាសាក្រុម ១,៥៧៥$
-៨ក្រុមចុងក្រោយ៖ វិញ្ញាសាឯកត្តជន ២,៥២០$ វិញ្ញាសាក្រុម ៣០៤៥$
-ពាក់កណ្ដាលផ្ដាច់ព្រ័ត្រ៖ វិញ្ញាសាឯកត្តជន ៦,០៩០ $ វិញ្ញាសាក្រុម ៥,៨៨០$
-វគ្គផ្ដាច់ព្រ័ត្រ៖ ១៥,៦៩០$ ទាំង២វិញ្ញាសា
-ម្ចាស់ជើងឯក៖ វិញ្ញាសាឯកត្តជន ៣១,៥០០$ វិញ្ញាសាក្រុម ៣៣,១៨០$
ពានរង្វាន់នេះមានកម្រិត Super 500 នៃការប្រកួតវាយសីអន្តរជាតិ ខណៈសហព័ន្ធកីឡាវាយសីថៃ រៀបចំឡើងនៅទីលាន Indoor Stadium Huamarkក្នុងរាជធានីបាងកក ចាប់ពីថ្ងៃទី៣០ ខែឧសភា ដល់៤ ខែមិថុនា ឆ្នាំ២០២៣។
ម្ចាស់ផ្ទះថៃ រៀបចំពានរង្វាន់វាយសី Thailand Open តាំងពីឆ្នាំ១៩៨៤ មកម៉្លេះ ហើយទទួលចុះឈ្មោះកីឡាករកីឡាការិនីខ្លាំងៗមកពីជុំវិញពិភពលោកគ្រប់ច្រកល្ហក ខណៈអត្តពលិករបស់ចិន ឈ្នះពានរង្វាន់ត្រឡប់ទៅស្រុកវិញទាំង៥វិញ្ញាសារហូតដល់៥៩លើក ហើយឥណ្ឌូណេស៊ី ឈ្នះបាន៣៨លើក កូរ៉េខាងត្បូង បាន២៤លើក ម្ចាស់ផ្ទះថៃ បាន១០លើកប៉ុណ្ណោះ៕