សិល្បៈជាតិ៖ មួយរយៈចុងក្រោយនេះ ឧកញ៉ា ខេមរៈ សិរីមន្ត ហាក់ដូចជាយីអ៊ុនដាក់បន្តិច ព្រោះគ្រប់សកម្មភាពរបស់លោកត្រូវបានអ្នកលេងបណ្ដាញសង្គមយកទៅត្រូលសើចចំអកឡកឡឺយ ដោយក្នុងនោះថែមទាំងមានព័ត៌មានខ្លះផ្សាយថាលោកឧកញ៉ារបូតបាត់ Follower ដោយសារតែចេញមុខការពារអ្នកឧកញ៉ា ឡេង ណាវ៉ាត្រា ក្នុងរឿងទំនាស់ដីធ្លី-បុរី ជាមួយនឹងអតិថិជន។ យ៉ាងណាមិញនៅក្នុងចំណោមអ្នកដែលរិះគន់ដល់លោកនោះក៏មានអតីតតារាសម្ដែង សុភ័ណ្ឌ ឡាវី ប៉ុន្តែអ្នកឧកញ៉ា ខែម ប៊ុនថៃ បែរជាចេញមកថ្លែងអំណរគុណរូបអតីតតារាសម្ដែងដែលរិះគន់ខ្លួនរូបនេះទៅវិញ។ តើព្រោះតែមូលហេតុអ្វីទៅ?
លោក សុភ័ណ្ឌ ឡារី គឺជាអតីតតារាសម្ដែងមួយរូបដែលបច្ចុប្បន្នកំពុងរស់នៅសហរដ្ឋអាមេរិកបានចេញមកឆ្លើយតបចំពោះវីដេអូ Live របស់ឧកញ៉ា ខេមរៈ សិរីមន្ត កន្លងមកដែលធ្លាប់លើកពីរឿងលោកចង់ស្គាល់មុខអ្នកកាប់ព្រៃឈើ ព្រោះលោកឧកញ៉ា ក៏ស្អប់អ្នកដែលកាប់បំផ្លាញព្រៃឈើដូចគ្នា ដោយលោក សុភ័ណ្ឌ ឡាវី បានបង្ហាញមុខនិងឈ្មោះឧកញ៉ាល្បីៗនៅស្រុកខ្មែរជាច្រើនថាជាអ្នកកាប់បំផ្លាញព្រៃឈើខុសច្បាប់ ព្រមទាំងស្នើឱ្យអាយដល លោកចង់សំដៅទៅឧកញ៉ា ខេមរៈ សិរីមន្ត ក្រោយពីដឹងហើយត្រូវហ៊ាននិយាយការពិតកុំស្ងាត់ព្រោះមានឋានៈស្មើគ្នា។
ថ្វីត្បិតតែការលើកឡើងរបស់លោក សុភ័ណ្ឌ ឡារី បានបញ្ចេញឈ្មោះបុគ្គលល្បីៗនៅក្នុងវិស័យជំនួញជាច្រើនរូប ប៉ុន្តែលោកឧកញ៉ា ខេមរៈ សិរីមន្ត មិនខឹងចំពោះវីដេអូឆ្លើយតបនោះឡើយ លោកបែរជាសរសើរចំពោះការឆ្លើយតបរបស់លោក សុភ័ណ្ឌ ឡារី ដែលមិនមានប្រើភាសាជេរបញ្ចោរ ឬប្រើពាក្យអសុរសណាមួយនោះឡើយ ដែលទង្វើនេះត្រូវបានលោកឧកញ៉ាចាត់ទុកថាជាគំរូល្អ បង្ហាញពីសីលធម៌ សុជីវធម៌របស់ខ្មែរសម្រាប់ក្មេងៗជំនាន់ក្រោយ។
នៅក្នុងវីដេអូដែលទើបតែបង្ហោះឆ្លើយតបនៅពេលថ្មីៗនេះ លោកឧកញ៉ាក៏បានរំលេចសារមួយដែរថា ទោះជាការគិតរបស់យើងបែបណាក្ដី មាននិន្នាការខុសគ្នាយ៉ាងណា តែគ្រប់យ៉ាងគឺដើម្បីប្រទេសជាតិខ្មែរទាំងអស់គ្នា។ លោកឧកញ៉ាក៏បានបញ្ជាក់ដែរថាលោកបច្ចុប្បន្នគឺគ្រាន់តែជាតារាចម្រៀងប៉ុណ្ណោះ មិនមែនជាអ្នកនយោបាយអ្វីនោះទេ តែលោកមានចិត្តបារម្ភចង់ចូលរួមយោបល់ដើម្បីសង្គមជាតិរបស់យើង។ ចុងក្រោយឧកញ៉ា ខេមរៈ សិរីមន្តបានអរគុណចំពោះការស្រលាញ់របស់ពុកម៉ែបងប្អូនដែលមានចំពោះខ្លួន និងសំណូមពរឱ្យរួមគ្នាទប់ស្កាត់ការកាប់បំផ្លាញព្រៃឈើខុសច្បាប់ ព្រមទាំងការពារក្រុមហ៊ុនដែលរកស៊ីស្របច្បាប់៕
ទស្សនាវីដេអូរបស់ឧកញ៉ា ខេមរៈ សិរិមន្ត ឆ្លើយតបអរគុណចំពោះវីដេអូលោក សុភ័ណ្ឌ ឡារី