យោងតាមការបញ្ជាក់របស់លោក Christophe Galtier គ្រូបង្វឹករបស់ក្លិបបាល់ទាត់ Paris Saint-Germain FC បានឲ្យដឹងថាខ្សែប្រយុទ្ធ Lionel Messi នឹងចាកចេញពីទឹកដី Parc des Princes ក្រោយចប់រដូវកាល ២០២២-២៣ នៅចុងសប្តាហ៍នេះ។
ការប្រកួតចុងក្រោយរបស់ Messi ឲ្យក្រុមបាល់ទាត់ PSG នឹងត្រូវជួបជាមួយ Clermont Foot នៅថ្ងៃទី៤ ខែមិថុនា វេលាម៉ោង ២:០០រំលងអធ្រាត្រ សប្តាហ៍ទី៣៨ នៃក្របខណ្ឌកំពូលបារាំង Ligue 1។
ប្រធានក្រុមជម្រើសជាតិអាហ្សង់ទីន Lionel Messi បានចូលរួមជាមួយ Paris Saint-Germain នៅទីក្រុងបារីស ប្រទេសបារាំង ដំបូងក្នុងឆ្នាំ២០២១ ដោយពាក់អាវលេខ៣០ បន្ទាប់ពីចាកចេញពីទីក្រុង Barcelona របស់អេស្ប៉ាញ។
នេះជាកាចាកចេញពីប្រទេសអេស្ប៉ាញ ជាលើកដំបូងរបស់ Messi ក្រោយធ្វើដំណើរទៅចូលរួមក្រុម Barcelona តាំងពីឆ្នាំ២០០០ ក្នុងនាមជាយុវជនថ្នាលមក។ រូបគេបានចុះកិច្ចសន្យារយៈពេល២ឆ្នាំនៅក្រុម PSG ក្នុងតម្លៃពលកម្ម៣៥លានអឺរ៉ូ ក្នុង១ឆ្នាំ (ប្រហែល៤០លានដុល្លារអាមេរិក)។
បច្ចុប្បន្នមានក្រុមបាល់ទាត់ចំនួន២ កំពុងរង់ចាំទទួល Messi ពោលគឺផ្ទះចាស់ FC Barcelona របស់អេស្ប៉ាញ ដែលកំពុងមានបញ្ហាផ្នែកហិរញ្ញវត្ថុ ខណ:អ្នកមាន Al Hilal របស់អារ៉ាប៊ីសាអូឌីត ហ៊ានផ្តល់ថវិកា ១ឆ្នាំ ៣០០លានអឺរ៉ូឯណោះ៕
