នៅថ្ងៃអាទិត្យ ទី៤ ខែមិថុនា ឆ្នាំ២០២៣ ជំនួបរវាង ណាហ្គាវើលដ៍ ប៉ះ ភ្នំពេញក្រោន វេលាម៉ោង ៦:៣០ នាទីល្ងាច វគ្គផ្តាច់ព្រ័ត្រ នៃពានរង្វាន់ Cambodian League Cup 2023 នឹងធ្វើឡើងនៅកីឡដ្ឋាន កងយោធពលខេមរភូមិន្ទ (ស្តាតចាស់)។
ខណ:ក្លិបបាល់ទាត់ណាហ្គាវើលដ៍ អាចប្រើប្រាស់កីឡាករបរទេសតែម្នាក់ប៉ុណ្ណោះគឺ Marques Marcio de Oliveira រីឯកីឡាករ Cristian Roque មិនអាចចូលលេងបានឡើយ ដោយសារជាប់ពិន័យកាតលឿង២សន្លឹក កាលពីវគ្គពាក់កណ្តាលផ្តាច់ព្រ័ត្រ។
ចំពោះលទ្ធផលវគ្គពាក់កណ្តាលផ្តាច់ព្រ័ត្រ៖
-ជើងទី១ គិរីវង់ ០-៣ ភ្នំពេញក្រោន
-ជើងទី២ ភ្នំពេញក្រោន ៣-០ គិរីវង់។
-ជើងទី១ ណាហ្គាវើលដ៍ ១-០ វិសាខា
-ជើងទី២ វិសាខា ១-១ ណាហ្គាវើលដ៍។
បច្ចុប្បន្នភ្នំពេញក្រោន គឺជាក្រុមដែលមិនទាន់ចាញ់សោះ គិតត្រឹមមុនប្រកួតវគ្គផ្ដាច់ព្រ័ត្រ ក្រោមការដឹកនាំរបស់លោក Oleg Starynskyi៖
ប្រកួតទី១៖ ភ្នំពេញក្រោន ២-០ សូលទីឡូអង្គរ នៅកីឡដ្ឋាន ស្មាត អ អេស អិន
ប្រកួតទី២៖ ភ្នំពេញក្រោន ១-០ ព្រះខ័នរាជស្វាយរៀង នៅកីឡដ្ឋាន ខ.ភ.ម
ប្រកួតទី៣៖ ភ្នំពេញក្រោន ៨-១ អង្គរថាយហ្គឺរ នៅកីឡដ្ឋាន ស្មាត អ អេស អិន
ប្រកួតទី៤៖ ភ្នំពេញក្រោន ២-១ ណាហ្គាវើលដ៏ នៅកីឡដ្ឋាន ខេត្តកំពង់ស្ពឺ
ប្រកួតទី៥៖ ភ្នំពេញក្រោន ១-០ អាយ អេស អាយ ដង្កោសែនជ័យ នៅកីឡដ្ឋាន AIA KMH Park
ប្រកួតទី៦៖ ភ្នំពេញក្រោន ៣-០ នគបាលជាតិ នៅកីឡដ្ឋាន ស្មាត អ អេស អិន
ប្រកួតទី៧៖ គិរីវង់ ០-៣ ភ្នំពេញក្រោន នៅកីឡដ្ឋានគិរីវង់ ប្រកួតទី៨៖ ភ្នំពេញក្រោន ៣-០ គិរីវង់ នៅកីឡដ្ឋាន ស្មាត អ អេស អិន។
សម្រាប់ពានរង្វាន់បាល់ទាត់ Cambodian League Cup ឆ្នាំ២០២៣ មានក្រុមចូលរួមចំនួន ១៤ក្រុមចូលរួម ដោយបែងចែកជា២ពូល ប្រកួតសន្សំពិន្ទុ ហើយក្រុមចំណាត់ថ្នាក់លេខ១និងលេខ២តាមពូលនីមួយៗមានឈ្មោះឡើងទៅប្រកួតវគ្គពាក់កណ្ដាលផ្ដាច់ព្រ័ត្រ។
គួរដឹងថាម្ចាស់ជើងឯកពានរង្វាន់ខេមបូឌានលីគខាប់ ឆ្នាំ២០២២ គឺបានទៅលើក្លិបបាល់ទាត់ភ្នំពេញក្រោន ក្រោយយកឈ្នះវិសាខា នៅវគ្គផ្តាច់ព្រ័ត្រ ក្នុងលទ្ធផល ២-១ ក្នុងកីឡដ្ឋាន Smart RSN៕
