សិល្បៈអន្តរជាតិ៖ នៅក្នុងឱកាសចូលរួមជាភ្ញៀវកិត្តិយសនៃកម្មវិធី «Showterview» រួមជាមួយនឹង Joy នៃក្រុម Red Velvet តារាចម្រៀង Jessi បានកត់សម្គាល់ឃើញពីភាពខុសប្លែកគ្នារវាងការគ្រប់គ្រងរបស់ផលិតកម្ម SM និងផលិតកម្ម P Nation។
ទាំង Joy និង Jessi ទាំងពីរនាក់បានចូលរួមជាកិត្តិយសនៅក្នុងកម្មវិធីតែមួយ ស្រាប់តែ Jessi បានកត់សម្គាល់ឃើញភ្លាមៗពីភាពខុសគ្នារវាងក្រុមហ៊ុនចម្រៀងទាំងពីរទៅលើការយកចិត្តទុកដាក់ចំពោះតារាចម្រៀង។ Joy គឺជាតារាចម្រៀងស្ថិតក្រោម SM Entertainment ចំណែក Jessi នៅក្នុងផលិតកម្ម P NATION របស់ PSY។
អ្វីដែល Jessi ចាប់អារម្មណ៍នោះគឺ Joy មានក្រុមការងារមកពីខាងផលិតកម្មចាំតាមដានគ្រប់សកម្មភាពថានាងកំពុងតែធ្វើអ្វីខ្លះ ដោយ Jessi បាននិយាយបែបកំប្លែងថា ក្រុមការងារបានបន្តសរសេរប្រាប់ Joy គ្រប់រឿងដូចជា «Joy និយាយបែបនេះ» ឬ «Joy រៀបនឹងសម្រក់ទឹកភ្នែក»។ល។
គ្រប់គ្នាសុទ្ធតែដឹងហើយថាក្រុមហ៊ុន SM Entertainment គឺជាផលិតកម្មដែលមានគោលការណ៍តឹងរឹងចំពោះរូបភាពខាងក្រៅរបស់តារាស្ថិតក្រោមការគ្រប់គ្រងរបស់ខ្លួន ផ្ទុយទៅវិញអ្នកគាំទ្រជឿថា P Nation ផ្ដល់សេរីភាពចំពោះតារារបស់ខ្លួនច្រើនជាងផលិតកម្មផ្សេងៗទៀត។
ទោះជា Jessi មិនដែលធ្លាប់ចុះកុងត្រាក្រោមផលិតកម្ម SM Entertainment ប៉ុន្តែតារាចម្រៀងរូបនេះពិតជាចង់ចូលរួមក្នុងផលិតកម្មនេះណាស់ ព្រោះពីអតីតកាលនាងធ្លាប់ Audition ក្នុងផលិតកម្ម SM ហើយថែមទាំងឆ្លងផុតជាប់ Audition ទៀត។ កាលពីឆ្នាំ ២០២២ ក្រោយចាកចេញពីផលិតកម្ម P Nation នាង Jessi បានចុះហត្ថលេខាចូលរួមរស់ជាមួយនឹងផលិតកម្មរបស់តារាចម្រៀង Jay Park ផលិតកម្ម More Vision ក្នុងឆ្នាំ២០២៣ នេះ៕
ប្រភព៖ បរទេស
