លោក Oleg Starynskyi លើកឡើងនៅក្នុងសន្និសីទសារព័ត៌មាន ក្រោយបញ្ចប់ការប្រកួតវគ្គផ្តាច់ព្រ័ត្រ នៃពានរង្វាន់ Cambodian League Cup រដូវកាល ២០២៣ ថាការប្រកួតជាមួយណាហ្គាវើលដ៍ គឺជាការប្រកួតដ៏តាន់តឹង តែលោកចង់ឲ្យបញ្ចប់ការប្រកួតត្រឹម ៩០នាទី។
គ្រូបង្វឹកភ្នំពេញក្រោន បាននិយាយថា៖ «ណាហ្គាវើលដ៍មានកីឡាករល្បឿនលឿន និងលេងការពារវាយបកបានល្អ តាមពិតទៅខ្ញុំចង់ឲ្យការប្រកួតនេះបញ្ចប់ទៅត្រឹម ៩០នាទី តែក្រុមបានប្រឹងប្រែងអស់ ហើយសំណាងមិននៅខាងយើង»។
លោក Oleg Starynskyi បានបន្ថែមថា៖ «សម្រាប់ការប្រកួតបែបនេះ ក្រុមរបស់យើងធ្លាប់បានជួបនៅវគ្គផ្សាច់ព្រ័ត្រកន្លងមក ហើយណាហ្គាវើលដ៍ បានប្រើប្រាស់ទម្រង់លេង ៥-៤-១ គឺជាការលេងលេងការពារខ្លាំង និងវាយបកលឿនៗ ប៉ុន្តយើងបានរៀបចំត្រៀមរួចជាស្រេចសម្រាប់ក្រុមរបស់ពួកយើង»។
គ្រូបង្វឹករូបនេះ បានលើកឡើងថា សម្រាប់ការប្រកួតនៅវគ្គផ្ដាច់ព្រ័ត្រនេះ យើងបានត្រៀមខ្លួនរួចរាល់ និងហ្វឹកហាត់បានយ៉ាងល្អ បន្ទាប់ពីសម្រាកព្រឹត្តិការណ៍ស៊ីហ្គេម លើកទី៣២។ លោកបានលើកឡើងថា សម្រាប់ការដាក់កីឡាករ ប្រាក់ ធីវ៉ា ឲ្យចូលលេងគឺគេគឺជាកីឡាករដែលមានបម្លាស់ទីបានលឿង ដោយឡែកសម្រាប់ លឹម ពិសុទ្ធ លោកសម្រេចដាក់ឲ្យចូលលេងនៅតង់ទី២ គឺដើម្បីឲ្យគេមានកម្លាំងពេញ ដូចឃើញស្រាប់ ពិសុទ្ធ បានបង្កើតឱកាសបាន ២ទោ៣ដល់នៅចុងម៉ោង។
គួរបញ្ជាក់ថា ក្រុមភ្នំពេញក្រោម បានគ្រងតំណែងជើងឯក Cambodian League Cup ឆ្នាំ២០២៣ បន្ទាប់ពីស្មើក្នុងលទ្ធផល ១-១ បន្ទាប់ពីម៉ោងបន្ថែម ១៥នាទី ២ដង និងឈ្នះដោយបាល់កាត់សេចក្ដី ១១ម៉ែត្រ ក្នុងលទ្ធផល ៣-២។ ដូចនេះភ្នំពេញក្រោម បានគ្រងតំណែងជើងឯក Cambodian League Cup ២ឆ្នាំជាប់គ្នា (២០២២ និងឆ្នាំ២០២៣)។
ស្នាដៃរបស់លោក Oleg Starynskyi នៅឆ្នាំ២០២២៖
-ឈ្នះពាន Cambodian Super Cup
-ឈ្នះពាន Cambodian League Cup
-ឈ្នះពានលីគកំពូលកម្ពុជា Cambodia Premier League
-ឈ្នះពានគ្រូបង្វិកល្អជាងគេ៕