សិល្បៈជាតិ៖ ក្រោយពីមានការទទូចចង់ឃើញកំពូលតារាចម្រៀង Rap លំដាប់ឈានមុខគេរបស់កម្ពុជា ងួន ចាន់ដេវីត ហៅ G-Devith នឹងលើកយកបទចម្រៀង «មហានគរ» ក្នុងព្រឹត្តិការណ៍កីឡាថ្នាក់ជាតិតែមិនអាចទៅរួចទីបំផុត ក្ដីស្រមៃរបស់អ្នកគាំទ្របានក្លាយជាការពិតហើយ ព្រោះបទចម្រៀងដ៏ល្បីរបស់ G-Devith នឹងត្រូវច្រៀងនិងសម្ដែងក្នុងជំនួបបាល់ទាត់រវាងកម្ពុជានិងប្រទេសបង់ក្លាដេស នៅសប្ដាហ៍ក្រោយនេះ។
សូមអាន៖ «មហានគរ» កក្រើកដូចផ្គរលាន់ ចំនួន Views កើនជិត២លានដង Youtubers Reaction ព្រោងព្រាត
យោងតាមការប្រកាសពីផេកផ្លូវការរបស់ G-Devith បានឱ្យដឹងថានៅថ្ងៃទី១៥ ខែមិថុនា ឆ្នាំ២០២៣ ខាងមុខនេះ ក្នុងការប្រកួតបាល់ទាត់រវាងប្រទេសកម្ពុជាជាម្ចាស់ផ្ទះ ប៉ះក្រុមភ្ញៀវប្រទេសបង់ក្លាដេស នៅវិមានពហុកីឡដ្ឋានជាតិ វេលា ១៩.០០យប់(៧យប់) បទចម្រៀងដ៏ពេញនិយម «មហានគរ(यशोधरपुर Yaśōdharapura)» នឹងត្រូវលើកយកមកច្រៀងនិងសម្ដែងនាឱកាសនោះដែរ។
ប្រិយមិត្តអ្នកគាំទ្របានសម្ដែងការអបអរសាទរ យ៉ាងក្រៃលែង ដែលក្ដីស្រមៃរបស់ពួកខ្លួនបានសម្រេចជោគជ័យក្រោយទន្ទឹង និងបន់ស្រន់ចង់ឃើញបទចម្រៀងដែលលើកស្ទួយសិល្បៈវប្បធម៌ អារ្យធម៌ របស់ដូនតាខ្មែរមួយនេះ អាចបង្ហាញវត្តមាននៅក្នុងព្រឹត្តិការណ៍កីឡាដែលមានអ្នកចូលរួមច្រើនកុះករ៕