Taylor Swift តារាចម្រៀងល្បី ដែលទើបតែបើកចិត្តសិក្សាគ្នាជាមួយនឹង Matty Healy មួយរយៈខ្លី ប៉ុន្តែនៅពេលនេះស្នេហារបស់អ្នកទាំងពីរបានដើរមកដល់ផ្លូវបែកបាក់។ នេះបើតាមផ្សាយរបស់សារព័ត៌មាន TMZ។
យោងតាមការឱ្យដឹងពីប្រភពខាងក្នុងបានទម្លាយថាមកដល់ពេលនេះបេះដូងរបស់ Taylor បានត្រលប់មកទំនេរម្ដងទៀត បើទោះបីជាមិនទាន់មានសេចក្ដីរាយការណ៍ជាក់លាក់ពីការបែកបាក់របស់អ្នកទាំងពីរក្ដី។
នៅក្នុងទំនាក់ទំនងដ៏ខ្លីមួយរយៈចុងក្រោយនេះ គេសង្កេតឃើញ Matty បានបង្ហាញវត្តមានក្នុងកម្មវិធីសម្ដែងខនសឺតរបស់ Taylor រហូតដល់ទៅ៣ដង ពោលគឺនៅក្រោយពីដំណឹងបែកបាក់រវាង Taylor និងអតីតសង្សារ Joe Alwyn ដែលសេពគប់គ្នារយៈពេល៦ឆ្នាំ។
អ្នកតាមដានបានសង្កេតឃើញ Matty និង Taylor កម្របែកគ្នាណាស់ ប្រសិនបើមិនមានកម្មវិធីសម្ដែងណានោះទេ អ្នកទាំងពីររមែងចំណាយពេលវេលានៅជាមួយគ្នានៅ NYC (New York City) ដោយមានទាំងការណាត់ជួបជុំមិត្តភក្ដិរបស់ខាងស្រី ក៏ដូចជាទៅស្ទីតយ៉ូ ថតសំឡេងជាដើម។
រឿងរ៉ាវរបស់អ្នកទាំងពីរមានអ្នកចេញមកទម្លាយថាគេឃើញ Matty បានវេចខោអាវទៅរស់នៅជាមួយនឹង Taylor ថែមទាំងបានជួបឪពុករបស់ខាងស្រីក្នុងខណៈនាងកំពុងដើរ Tour Concert Eras ផងដែរ។
ថ្វីត្បិតអ្នកទាំងពីរទើបតែចាប់ផ្ដើមស្វែងយល់ចិត្តគ្នាមួយរយៈខ្លី ប៉ុន្តែតារាទាំងពីរដួងនេះបានស្គាល់គ្នាតាំងពីឆ្នាំ២០១៤មកម្ល៉េះ ពោលគឺចាប់តាំងពីនាងបានចូលរួមសម្ដែងកិត្តិយសក្នុងក្រុមចម្រៀង The 1975 របស់ Matty។ ការដែលអ្នកគាំទ្រចាប់ផ្ដើមសង្ស័យពីទំនាក់ទំនងរបស់អ្នកទាំងពីរព្រោះចាប់តាំងពីថ្ងៃទី២៥មក គេមិនដែលឃើញអ្នកទាំងពីរចេញក្រៅញ៉ាំអាហារពេលល្ងាចជាមួយគ្នាទៀតនោះទេ។
សម្រាប់រឿងស្នេហាអ្នកទាំងពីរមិនទាន់អាចបញ្ជាក់ច្បាស់លាស់ថាបានបែកគ្នាពិតប្រាកដឬយ៉ាងណានោះឡើយ គ្រាន់តែមានតម្រុយខ្លះៗនៅពេលដែលក្រុម The 1975 បានសម្ដែងនៅក្នុងប្រទេស ដាណឺម៉ាក កាលពីចុងសប្ដាហ៍កន្លងទៅ ដោយនៅក្នុងអំឡុង Concert នាចុងសប្ដាហ៍កន្លងទៅលោកបាននិយាយពីរឿងបេះដូងទំនេរ និងកំពុងស្វែងរកអ្នកមកមើលថែបេះដូង ខណៈដែល Taylor ក៏ដូចគ្នា៕
ប្រភព៖ TMZ