នៅល្ងាចថ្ងៃទី៩ ខែមិថុនា ឆ្នាំ ២០២៣នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នឹងអញ្ជើញជាអធិបតីភាពដ៏ខ្ពង់ខ្ពស់នៅក្នុងពិធីបិទព្រឹត្តិការណ៍អាស៊ានប៉ារ៉ាហ្គេម លើកទី១២ ដែលកម្ពុជាបានធ្វើជាម្ចាស់ នៅពហុកីឡាដ្ឋានជាតិមរតកតេជោ។
ក្នុងន័យនេះ គណៈកម្មាធិការជាតិ CAMSOC-CAMAPGOC បានបញ្ជាក់ឱ្យបានដឹងថា ចំពោះប័ណ្ណចូលទស្សនា និងប័ណ្ណរថយន្ត អាចប្រើប្រាស់ឡើងវិញនូវប័ណ្ណដែលគណៈកម្មាធិការជាតិបានផ្ដល់ជូនក្នុងពេលពិធីបើកជាផ្លូវការព្រឹត្តិការណ៍កីឡាអាស៊ានប៉ារ៉ាហ្គេមលើកទី ១២ ឆ្នាំ ២០២៣ កាលពីថ្ងៃទី៣ ខែមិថុនា ឆ្នាំ២០២៣ កន្លងមក។
ទន្ទឹមគ្នានេះ គណៈកម្មាធិការជាតិ CAMSOC-CAMAPGOC ក៏សូមអញ្ជើញអ្នកចូលរួមមកដល់ពហុកីឡដ្ឋានជាតិមរតកតេជោ នៅវេលាម៉ោង ១៦:០០ នាទីរសៀល ដោយរក្សាទីតាំងកន្លែងអង្គុយដូចដែលមានកំណត់ក្នុងប័ណ្ណទស្សនារួចហើយ។
គួរដឹងថាការប្រកួតកីឡាអាស៊ានប៉ារ៉ាហ្គេម លើកទី១២ មាន១៤ប្រភេទ រួមមានកីឡាប៊ូស្យា បាល់ទាត់ម្ខាង៥នាក់ (ចលករខួរក្បាល) បាល់បោះពិការភ្នែក វាយសី វាយកូនឃ្លីលើតុ បាល់ទះអង្គុយ អុក បាល់ទាត់ម្ខាង៧នាក់ (ចលករខួរក្បាល) អត្តពលកម្ម ហែលទឹក លើកទម្ងន់ បាល់ទះលើរទេះ យូដូ និងកីឡាអេឡិចត្រូនិច (Demonstration Sport)។
ព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ មាន ១១ប្រទេសដដែល ប៉ុន្តែប្រកួតប្រជែង ចំនួនប្រតិភូ កីឡាករ កីឡាការិនីសរុបមានប្រមាណ ២៦០០នាក់ ក្នុងនោះអត្តពលិកសរុប ប្រមាណ ១៤០០នាក់ចាប់ផ្ដើមប្រកួតពីថ្ងៃទី០៣-០៩ ខែមិថុនា ឆ្នាំ២០២៣ នៅរាជធានីភ្នំពេញ បន្ទាប់ពីទទួលបានជោគជ័យក្នុងការធ្វើម្ចាស់ផ្ទះកីឡាស៊ីហ្គេមលើកទី៣២ ចាប់ពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣៕