កីឡាករប្រដាល់គុនខ្មែរ ទិត សោភ័ណ្ឌ (រឿង សោភណ្ឌ) ម្ចាស់មេដាយមាសគុនខ្មែរ ក្នុងព្រឹត្តិការណ៍ស៊ីហ្គេម នៅកម្ពុជា ត្រូវបានដំឡើងឋានន្តរសក្ដិពីថ្នាក់អនុសេនីយ៍ឯក ទៅថ្នាក់វរៈសេនីយ៍ត្រី ក្នុងក្របខ័ណ្ឌនគរបាលជាតិ នៃក្រុមប្រឹក្សាកីឡាក្រសួងមហាផ្ទៃ បន្ទាប់ពីដណ្ដើមបានមេដាយមាស ជូនជាតិរួចមក។
កីឡាករ រឿង សោភណ្ឌ គឺជាម្ចាស់មេដាយ ១រូបក្នុងចំណោមកីឡាករគុនខ្មែរ ១៤រូបដែលបានដណ្ដើមមេដាយមាស ជូនកម្ពុជា ក្នុងព្រឹត្តិការណ៍ស៊ីហ្គេម ប្រភេទកីឡាគុនខ្មែរ វិញ្ញាសា ៧១គីឡូ ផ្នែកបុរស ក្រោយយកឈ្នះលើកីឡាករវៀតណាម Nguyễn Hồng Quân នៅវគ្គផ្ដាច់ព្រ័ត្រ។
យោងតាមប្រភពដែលគួរឲ្យទុកចិត្តមួយបានបង្ហើបថា ក្រៅពីកីឡាករ រឿង សោភណ្ឌ ក៏មានកីឡាករគុនខ្មែរដទៃទៀត ដែលស្ថិតនៅក្រោមចំណុះរបស់ក្រសួងមហាផ្ទៃ ក៏ត្រៀមចូលក្របខ័ណ្ឌជាមន្ត្រីនគបាលជាតិ ផងដែរ ក្រោយដណ្ដើបានមេដាយមាស ក្នុងព្រឹត្តិការណ៍ស៊ីហ្គេម លើកទី៣២ រួចមក។
គួរបញ្ជាក់ថា សម្រាប់ប្រភេទកីឡាគុនខ្មែរ កម្ពុជាដណ្តើមបានមេដាយសរុប ១៩គ្រឿង ក្នុងនោះមេដាយមាស ១៤គ្រឿង មេដាយប្រាក់ ៣គ្រឿង និងមេដាយសំរឺទ្ធ ២គ្រឿង ប្រកួតចាប់ពីថ្ងៃទី០៦ ដល់ថ្ងៃទី១១ ខែឧសភា ឆ្នាំ២០២៣ ក្នុងព្រឹត្តិការណ៍ប្រកួតកីឡាស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះ៕