ក្រុមបាល់ទាត់ជម្រើសជាតិបង់ក្លាដែស នឹងចេញដំណើរមកកាន់កម្ពុជា នៅថ្ងៃទី១០ ខែមិថុនា ឆ្នាំ២០២៣នេះ តាមជើងយន្តហោះ TG-322 នៅម៉ោង ១:៣៥នាទីរសៀល។ នេះបើតាមការបញ្ជាក់ពីលោក Javier Fernandez Cabrera Martin Penato គ្រូបង្វឹកក្រុមបាល់ទាត់ជម្រើសជាតិបង់ក្លាដែស ក្នុងសន្និសីទកាសែតមួយ ធ្វើឡើងកាលពីថ្ងៃទី០៩ មិថុនា ម្សិលមិញ។
នេះគឺជាជំនួបដំបូងហើយរបស់លោក Félix Dalmás ដែលដឹកនាំក្រុមកម្ពុជាប្រកួត បន្ទាប់ពីសហព័ន្ធបាល់ទាត់កម្ពុជា បានប្រកាសតែងតាំង ជាគ្រូបង្គោលថ្មីកាលពីថ្ងៃទី០២ មេសា ឆ្នាំ២០២៣ ជំនួសលោក Honda ក្រោយបញ្ចប់ភារកិច្ចប្រកួតស៊ីហ្គេម លើកទី៣២។
កាលពីព្រឹកថ្ងៃទី៥ ខែមិថុនា សហព័ន្ធកីឡាបាល់ទាត់កម្ពុជា បានប្រកាសបញ្ជីរាយនាមបឋមកីឡាករជម្រើសជាតិកម្ពុជា ចំនួន៣០នាក់ និងកំពុងុំហ្វឹកហាត់ត្រៀមប្រកួតមិត្តភាពអន្តរជាតិទល់នឹងក្រុមជម្រើសជាតិបង់ក្លាដែស នៅថ្ងៃទី១៥ ខែមិថុនា ឆ្នាំ២០២៣។
រំលឹកថា មុនប៉ះគ្នាក្នុងជំនួបមិត្តភាពអន្តរជាតិ នៅថ្ងៃទី១៥ ខែមិថុនា ឆ្នាំ២០២៣ (FIFA Day ) ខាងមុខនេះ ក្រុមទាំង២ធ្លាប់ប៉ះម្ដង ក្នុងជំនួបមិត្តភាពអន្តរជាតិដែរ កាលពីខែកញ្ញា ឆ្នាំ២០២២ កន្លងទៅ ដោយលទ្ធផលកាលនោះកម្ពុជា បានចាញ់បង់ក្លាដែស ក្នុងលទ្ធផល ១-០៕
